Summary -

• १८०० कोटींच्या पुणे जमीन घोटाळा प्रकरणात मोठी कारवाई

• ३ आरोपींविरोधात बावधन पोलिस ठाण्यात गुन्हा दाखल

• आरोपींमध्ये शितल तेजवानी, दिग्विजय पाटील आणि रवींद्र तारू यांचा समावेश

• अमेडिया कंपनीवर व्यवहारातील अनियमिततेचा आरोप

अक्षय बडवे, पुणे

राज्याचे उपमुख्यमंत्री अजित पवार यांचे सुपुत्र पार्थ पवार कथित जमीन व्यवहार प्रकरणात मोठी अपडेट समोर आली आहे. या जमीन व्यवहार प्रकरणात शितल तेजवानी, दिग्विजय पाटील आणि रवींद्र तारू या तिघांविरोधात फौजदारी गुन्हा दाखल करण्यात आला आहे. पुण्यातील बावधन पोलिस ठाण्यामध्ये या प्रकरणी गुन्हा दाखल करण्यात आला असून पोलिस सध्या तपास करत आहेत. नोंदणी उपमहानिरीक्षकांचे पत्रातून माहिती समोर आली आहे. पण या पत्रात पार्थ पवार यांचे नाव नाही. त्यामुळे याप्रकरणात पार्थ पवार यांना क्लीन चिट? दिली की काय अशी चर्चा सुरू आहे.

पुण्यातील मुंढवा भागातील ४० एकर जमिनीच्या खरेदीचा दस्त केल्याने पार्थ पवार यांची अमेडिया कंपनी वादाच्या भोवऱ्यात सापडली आहे. जमिनीची विक्री करणाऱ्या शीतल तेजवानी, अमेडिया कंपनीतील पार्थ पवार यांचा भागीदार दिग्विजय पाटील आणि सह दुय्यम निबंधक रवींद्र तारू यांच्यावर बावधन पोलिस ठाण्यात गुन्हा दाखल करण्यात आला आहे.

दिग्विजय पाटील हे सध्या पुण्यातील गोखलेनगर भागात असलेल्या एका उच्चभ्रू सोसायटीमध्ये वास्तव्यास आहेत. गुन्हा दाखल झाल्यानंतर आता पोलिस नेमकी त्यांची चौकशी करून पुढील कार्यवाही करणार का हे पाहणं महत्त्वाचं असेल. गुन्हा दाखल झालेल्या तिघांवर पोलिस नेमकी काय कारवाई करणार आहेत ते पाहणं महत्वाचे ठरेल.

दरम्यान, राज्याचे उपमुख्यमंत्री अजित पवार यांचे सुपुत्र पार्थ पवार यांच्यावर जमीन घोटाळ्याचा गंभीर आरोप करण्यात आला आहे. शिवसेना ठाकरे गटाचे नेते अंबादास दानवे यांनी हा आरोप केला आहे. पार्थ पवारांच्या अमीडिया कंपनीने १८०४ कोटींची जमीन फक्त ३०० कोटींना विकत घेतल्याचा गंभीर आरोप आहे. या आरोपानंतर आता राजकारण तापले आहे. याप्रकरणी राज्याचे मुख्यमंत्री देवेंद्र फडणवीस यांनी प्रतिक्रिया देत जमीन खरेदी प्रकरणी चौकशीचे आदेश दिले आहेत.