सातारा डॉक्टर आत्महत्या प्रकरणात मोठी अपडेट
आरोपी पीएसआय गोपाल बदनेला पोलिस दलातून बडतर्फ
कोल्हापूर परिक्षेत्राचे आयजी सुनील फुलारी यांच्या आदेशानंतर कारवाई
डॉक्टरने सुसाईड नोटमध्ये बदनेवर मानसिक आणि शारीरिक त्रासाचा आरोप केला होता
सातारा डॉक्टर महिला आत्महत्या प्रकरणात मोठी अपडेट समोर आली आहे. या प्रकरणातील आरोपी पोलिस उपनिरीक्षक गोपाल बदनेला पोलिस सेवेतून बडतर्फ करण्यात आले आहे. गोपाल बदनेला बडतर्फ करण्यात आल्याचे आदेश कोल्हापूर परिक्षेत्राचे विशेष पोलिस महानिरीक्षक सुनील फुलारी यांनी दिले आहेत. महिला डॉक्टरने आत्महत्या करण्यापूर्वी लिहिलेल्या सुसाईड नोटमध्ये गोपाल बदनेवर गंभीर आरोप केले होते.
पोलिस महानिरीक्षक सुनील फुलारी यांनी दिलेल्या आदेशानुसार, फलटण शहर पोलिस ठाण्याच्या गुन्हा क्रमांक ३४५/२०२५ मध्ये अटक केलेले आरोपी पीएसआय गोपाल बाळासाहेब बदने आधीच निलंबित आहे. पोलिस दलातील जबाबदाऱ्या आणि कर्तव्यांची पूर्ण जाणीव असूनही पीएसआय बदनेने अत्यंत बेपर्वाईने वर्तन केले. नैतिक अध:पतन आणि गैरवर्तन दाखवले. तसंच आपल्या पदाचा आणि अधिकाऱ्याचा गैरवापर केला. त्याच्या वागणुकीमुळे समाजात असुरक्षिततेची भावना निर्माण झाली आहे.
तसंच,'गोपाल बदनेने पोलिस उपनिरीक्षक या पदाला न शोभणारी कृत्य केली आणि आपल्या कर्तव्याला पार पाडण्यात तसेच वैयक्तिक जीवनात संशयास्पद वर्तन केले. याव्यतिरिक्त त्यांनी केलेली कृत्ये अत्यंत घृणास्पद आणि निंदनीय आहेत. त्यामुळे सार्वजनिक आणि सर्वसामान्यांच्या हिताच्या दृष्टीने गोपाळ बाळासाहेब बदनेला शासकीय सेवेत ठेवणे योग्य ठरणार नाही.', असे म्हणत सुनील फुलारी यांनी गोपाल बदनेला बडतर्फ केले.
दरम्यान, साताऱ्यातल्या फलटण शासकीय रुग्णालयात कार्यरत असलेल्या महिला डॉक्टरने आत्महत्या केली होती. फलटणमधील एका हॉटेलमधील खोलीमध्ये डॉक्टरने गळफास घेत आयुष्य संपवले होते. आत्महत्या करण्यापूर्वी डॉक्टरने हातावर सुसाईट नोट लिहिली होती. त्यामध्ये तिने पीएसआय गोपाल बदने आणि प्रशांत बनकर यांच्यावर मानसिक आणि शारीरिक त्रास दिल्याचा तसेच बलात्कार केल्याचा आरोप केला होता. या घटनेनंतर पोलिसांनी दोघांना अटक केली. अटकेनंतर गोपाल बदनेला निलंबित करण्यात आले होते. आता त्याला पोलिस दलातून बडतर्फ करण्यात आले.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.