Satara News : सातारा डॉक्टर महिला मृत्यू प्रकरणात ट्विस्ट, पीडितेच्या हात आणि पत्रावरील हस्ताक्षर जुळत नाही? ठाकरे गटाचा मोठा दावा

ओमकार कदम, सातारा

मुंबई : साताऱ्यातील डॉक्टर महिलेच्या मृत्यू प्रकरणात नवनवीन खुलासे समोर येऊ लागले आहेत. या प्रकरणात ठाकरे गटाच्या महिला नेत्या सुषमा अंधारे यांच्याकडून नवनवीन आरोप केले जात आहेत. त्यामुळे या प्रकरणाचा गुंता आणखी वाढत चालल्याचे दिसत आहे. पीडित डॉक्टर महिलेच्या हात आणि पत्रावरील हस्ताक्षर जुळत नसल्याचा दावा ठाकरे गटाच्या महिला नेत्या सुषमा अंधारे यांनी केला आहे. त्यानंतर पीडितेची ही हत्या आहे की आत्महत्या आहे, असा सवाल त्यांनी उपस्थित केला आहे.

नवी मुंबईच्या पोलीस अधिकारी अश्विनी बिंद्रे हत्याकांडाचं उदाहरण देत सातारा प्रकरणात मोठे आरोप केले आहेत. साताऱ्यातील डॉक्टर महिलेच्या हातावर पोलीस निरीक्षक लिहलेल्या शब्दात आणि पत्रात लिहिलेल्या शब्दात तफावत असल्याचा दावा अंधारे यांनी केला. दोन्ही हस्ताक्षराचे फोटो अंधारे यांनी दाखवले.

अंधारे यांनी दावा केला आहे की, 'पीडितेच्या हातावर 'निरीक्षक' असा शब्द लिहिण्यात आला आहे. त्यात पहिली वेलांटी देण्यात आली आहे. तर डॉक्टर महिलेच्या पत्रात त्याच शब्दाला दुसरी वेलांटी देण्यात आली आहे. तिने पत्रात एकूण ९ वेळा निरीक्षक शब्द लिहिला आहे'.

५० कोटींच्या नोटीशीवर अंधारे काय म्हणाल्या?

सुषमा अंधारे म्हणाल्या की, 'मला पुण्यात ५० कोटींच्या दाव्याची नोटीस आली आहे. मी काल महिला आयोगाच्या भूमिकेवर प्रश्न निर्माण केले. कालच्या बोलण्यात एक गोष्ट सांगायची राहून गेली. एखाद्या प्रकरणात घटनेनंतर घटनास्थळाचा मुद्देमाल, लॅपटॉप आणि फोन जप्त केले जातात. या प्रकरणाची माहिती गोपनीय असते. कोर्टाच्या परवानगीनुसार कोर्टात सादर करायची असते. आम्ही या प्रकरणात सीडीआरची मागणी करतोय'.

दरम्यान, सुषमा अंधारे यांनी महिला आयोगाच्या अध्यक्षा रुपाली चाकणकर यांच्या राजीनाम्याची मागणी केली. अंधारे यांच्या मागणीनंतर रुपाली चाकणकर काय प्रतिक्रिया देतात, हे पाहावे लागेल.