पुण्यातील पिंपरी चिंचवडमध्ये दिवसाढवळ्या एका ८ वर्षांच्या मुलाचं अपहरण करण्यात आलं होतं. मुलाला ५० हजाराला विकण्यासाठी आरोपीने अपहपण करून काशी एक्सप्रेसने पळ काढण्याचा प्रयत्न केला. याची माहिती मिळाल्यानंतर चिंचवड पोलीस आणि रेल्वे सुरक्षा दलाने आरोपीला पकडले, तसेच मुलाची सुटका केली. नंतर चिमुकल्याला त्याच्या आई - वडिलांकडे सुपूर्द केले. या प्रकरणी पोलीस अधिक तपास करीत असून, आरोपीने मुलाचे अपहरण का केले? याचा शोध सुरू आहे.

नक्की प्रकरण काय?

पोलिसांनी दिलेल्या माहितीनुसार, आरोपीचे नाव गजानन पानपाटील असे आहे. तो चार दिवसांपूर्वी चिंचवडमध्ये आला होता. पीडित मुलाच्या कुटुंबाच्या घरी तो वारंवार जात असल्याची माहिती आहे. तो मुलाला चॉकलेट आणि बिस्किटांचे आमिष दाखवत होता. तसेच मुलासोबत गोड बोलायचा. एके दिवशी आरोपीने मुलाच्या आईकडे वेगळीच मागणी केली. मुलाला ५० हजार रूपयांमध्ये विकण्यास सांगितले.

आरोपीने केलेल्या मागणीवर मुलाच्या आईने स्पष्ट नकार दिला. नंतर आरोपीने मुलाचे अपहरण करण्याचे ठरवले. ३१ मार्चला मुलाचे आई - वडील कामाला गेले होते. आरोपीने मुलाचे अपहरण करून थेट चाळीसगावात धूम ठोकली. सायंकाळी मुलाची आई आणि वडील आले. त्यांनी मुलाची शोधाशोध केली. मात्र, मुलगा कुठेच सापडला नाही. मुलाच्या आई वडिलांना गजाननवर संशय आला. त्यांनी पोलिसांना याची माहिती दिली.

चिंचवड पोलिसांना तपासात आरोपी मुलाला चाळीसगावात घेऊन गेल्याचे समोर आले. सीसीटीव्ही फुटेजच्या आधारे आरोपीला एक्सप्रेसमधून ताब्यात घेण्यात आले. तसेच त्याला पिंपरी चिंचवडला आणण्यात आले. दरम्यान, आरोपीला २ मुले असूनही त्याने मुलाचे अपहरण का केले? आणि कुणासाठी केले? मुलाला विकायचा प्लान होता का? याचाही तपास सुरू आहे.