अक्षय बडवे, साम टीव्ही, प्रतिनिधी

पुण्यातील नवले पुलाजवळ असलेल्या नाल्यात एक वयोवृद्ध महिला वाहून गेली होती. त्या पीडित महिलेचा मृत्यू झाल्याची माहिती समोर आली आहे. नाल्याच्या पाण्यात वाहून गेलेल्या महिलेचा मृतदेह शोधून काढण्यात पोलिसांना यश आले आहे. वारजे स्मशानभूमीजवळ पाण्यातून महिलेचा मृतदेह बाहेर काढण्यात आला आहे.

मिळालेल्या माहितीनुसार, शोभा मनोहर महिमाने या ६५ वर्षीय आजी नवले पुलाजवळ असलेल्या नाल्यात काल (१२ जून) रात्रीच्या सुमारास वाहून गेल्या होत्या. त्यांचा मृतदेह वारजे स्मशानभूमीजवळ आढळला. त्यानंतर पोलीस आणि अग्निशमन दलाच्या जवानांनी शोभा यांचा मृतदेह पाण्यातून बाहेर काढल्याची माहिती समोर आली आहे.

शोभा महिमाने या मुळच्या फुरसंगी येथील रहिवासी आहेत. त्या कोल्हापूर ते पुणे असा प्रवास करुन पुण्यात आल्या होत्या. त्यानंतर शोभा बंगळुरू महामार्गावरील पुलावरुन उतरल्या. रिक्षा पकडण्यासाठी त्या रस्ता ओलांडण्यासाठी पुढे आल्या. रस्ता ओलांडत असताना शोभा रस्त्याच्या कडेला असलेल्या नाल्यात पडल्या. नाल्याच्या पाण्यात त्या वाहून गेल्या.

सुमारे दहा ते बारा दिवसांच्या विश्रांतीनंतर गुरुवारी रात्री पुण्याला विजांचा कडकडाट, मेघगर्जनेसह मुसळधार पावसाचा जोरदार तडाखा बसला. दिवसभर ऊन आणि ढगाळ हवामान होते. पावसाची शक्यता कमी वाटत असतानाही रात्री दहानंतर अचानक जोरदार पावसाला सुरुवात झाली. शहर आणि परिसरात काही वेळातच पावसाने कहर केला. हवामान विभागाने पुणे जिल्ह्यासाठी पुढील तीन दिवस ‘यलो अलर्ट’ जारी केला आहे.