अक्षय बडवे, साम टीव्ही, प्रतिनिधी

पाकिस्तान जिंदाबाद या घोषणांमुळे १९ वर्षीय तरुणीवर कारवाई करण्यात आली आहे. सोशल मीडियावर पाकिस्तान समर्थनार्थ पोस्ट केल्याप्रकरणी पुण्यातील कोंढवा भागात राहणाऱ्या या तरुणीला अटक करण्यात आली आहे. पाकिस्तान जिंदाबादच्या घोषणांमुळे कोंढवा पोलीस ठाण्यात तरुणीच्या विरोधात गुन्हा दाखल करण्यात आला आहे.

मिळालेल्या माहितीनुसार, पुण्यात शिकत असलेल्या एका तरुणीने तिच्या सोशल मीडिया अकाउंटवर पाकिस्तानच्या समर्थनार्थ पोस्ट लिहिली होती. यात तिने पाकिस्तान जिंदाबाद अशी घोषणा लिहल्या असल्याची माहिती सकल हिंदू समाज यांनी प्रसिद्ध केली होती. या माहितीमुळे परिसरात खळबळ उडाली होती.

याबाबत कोंढवा पोलिसांनी तत्काळ दखल घेतली आणि संबंधित प्रकरणात तरुणीला ताब्यात घेऊन तिच्यावर दोन धर्मांमध्ये तेढ निर्माण केल्याप्रकरणी तसेच भारताच्या सार्वभौमत्वाला किंवा एकतेला आणि अखंडतेला धोका निर्माण केल्याप्रकरणी तिला अटक करण्यात आली आहे.

पुणे पोलिस उपायुक्त राजकुमार शिंदे यांनी या प्रकरणाची माहिती दिली. 'पुणे शहरात कोंढवा पोलीस ठाण्याच्या हद्दीमध्ये एका युवतीने सोशल मीडियावर पाकिस्तान जिंदाबाद वगैरे स्वरूपाची पोस्ट केल्याने तिच्या विरोधात गुन्हा दाखल करण्यात आलेला आहे. कोंढवा पोलीस यांनी तिला अटक केली असून पुढील कारवाई चालू आहे,' असे वक्तव्य राजकुमार शिंदे यांनी केले आहे.