अक्षय बडवे, पुणे

पुण्यामध्ये भांडण सोडवण्यासाठी गेलेल्या तरुणाची निर्घृण हत्या करण्यात आल्याची धक्कादायक घटना समोर आली आहे. पुण्याच्या गुलटेकडी परिसरामध्ये मधयरात्री ही घटना घडली. सुनील सरोदे असं हत्या झालेल्या तरुणाचे नाव आहे. सुनील भांडण सोडवण्यासाठी गेला होता. त्यावेळी त्याची रोहन कांबळे आणि शिवशरण कांबळे या सख्ख्या भावांनी हत्या केली. सुनीलची हत्या पूर्ववैमनस्यातून झाल्याची माहिती समोर आली आहे.

मिळालेल्या माहितीनुसार, सुनील सरोदे, रोहन कांबळे आणि शिवशरण कांबळे हे तिघे ही मित्र आहेत. ७ जुलै रोजी आरोपी रोहनचा वाढदिवस होता. त्यावेळी सुनील सरोदेने त्याला मारहाण केली होती. याचा राग रोहन आणि शिवशरण कांबळे या सख्ख्या भावांच्या मनामध्ये होता. यावरूनच या दोघांनी सुनीलचा काटा काढण्याचे ठरवले.

मंगळवारी रात्री रोहन कांबळे आणि शिवशरण कांबळे हे दोघेही सुनील सरोदेच्या घरी गेले. त्यांनी सुनील सरोदेचा भाऊ गणेशला मारहाण करण्यास सुरूवात केली. त्यावेळी सुनील त्यांचे भांडण सोडवण्यासाठी गेला. रोहन आणि शिवशरण यांच्या मनामध्ये सुनीलविषयी आधीच राग होता. त्यांनी सोबत आणलेला कोयता काढून सुनीलच्या गळ्यावर वार केला.

या हल्ल्यामध्ये गंभीर जखमी झालेल्या सुनील सरोदे याला तात्काळ रुग्णालयामध्ये हलवण्यात आले. पण उपचारापूर्वीच डॉक्टरांनी त्याला मृत घोषीत केले. रोहन कांबळे, शिवशरण कांबळे हे दोघेही गुन्हेगारीवृत्तीतचे आहेत. ते नुकताच जामीनावर जेलबाहेर आले होते. सुनील सरोदेच्या हत्येप्रकरणी पोलिसांनी या दोघांना अटक केली असून पोलिस पुढील तपास करत आहेत.