पुण्यातील आव्हाळवाडीच्या वाघोली येथील वारुळे दांपत्याने आर्थिक अडचणींमुळे आत्महत्या केली होती. राहत्या घरात दांपत्याचा आकस्मिक मृत्यू झाल्याची नोंद पोलिसांनी केली होती. पण पोस्टमार्टममधून मृत्यूसंबंधित नवी माहिती समोर आली आहे. पतीने पत्नीला मारहाण करुन तिचा गळा आवळला. त्यानंतर स्वत: गळफास घेत आत्महत्या केली. धक्कादायक माहितीमुळे परिसरात खळबळ उडाली आहे.

नागनाथ वारुळे (वयवर्ष ४३) आणि त्यांची पत्नी उज्वला वारुळे (वयवर्ष ४०) यांनी आर्थिक विवंचेनेतून आत्महत्या केल्याचे सुरुवातीला म्हटले जात होते. वाघोली येथील बाजारात वारुळे दांपत्य फळ विक्री करण्याचे काम करत होते. काबाडकष्ट करुन दोघांचा संसार सुरु होता. आर्थिक अडचणींमुळे त्यांनी आत्महत्या केल्याचा अंदाज वर्तवला जात होता.

उज्वला यांच्या अंगावरील खुणा, मारल्याचे घाव; तसेच घटनास्थळी आढळलेला लोखंडी हातोडा, चाकू आणि रक्ताने माखलेली ओढणी यावरुन नागनाथ यांनीच त्यांच्या पत्नीची हत्या केल्याचे निष्पन्न झाले आहे. उज्वला यांची हत्या केल्यानंतर नागनाथ वारुळे यांनी स्वत:चा जीव घेतला अशी नवी माहिती समोर आली आहे. पत्नीची हत्या केल्याप्रकरणी पोलिसांनी मृत पतीवर खुनाचा गुन्हा दाखल करण्यात आला आहे.

नागनाथ यांनी उज्वला यांची हत्या करुन आत्महत्या केली. यामागे आर्थिक अडचणी हे कारण आहे अशी शक्यता असल्याचे म्हटले जात आहे. तरीही या घटनेचे खरे कारण अद्यापही स्पष्ट झालेले नाही. वाघोली पोलीस या प्रकरणाचा सखोल तपास करत आहेत. आसपासच्या परिसरात या घटनेची मोठी चर्चा पाहायला मिळत आहे.