नितीन पाटणकर, पुणे

पुण्यामध्ये महिला अत्याचाराच्या घटना सुरूच आहेत. पुण्यात महिला अत्याचाराची आणखी एक धक्कादायक घटना उघड झाली आहे. ३२ वर्षीय महिलेचा अपहरण करून तिला मारहाण करण्यात आली. त्यानंतर कर्जतच्या जंगलात नेऊन या महिलेवर अत्याचार करण्यात आले. याप्रकरणी दोन जणांविरोधात सहकारनगर पोलिस ठाण्यामध्ये गुन्हा दाखल करण्यात आला आहे. आरोपींमध्ये एका महिलेचा समावेश आहे.

मिळालेल्या माहितीनुसार, पुण्यातील महिलेवर कर्जतच्या जंगलात अत्याचाराचा प्रयत्न करण्यात आला. ३२ वर्षे महिलेचे अपहरण करून कर्जतच्या जंगलात नेऊन तिच्यावर अत्याचार करण्याचा प्रयत्न केला गेला. पीडित महिला पुण्यातील सहकारनगर भागामध्ये राहते. याप्रकरणी ३६ वर्षीय पुरुष आरोपी आणि ३२ वर्षे महिला आरोपी विरोधात सहकारनगर पोलिसात गुन्हा दाखल करण्यात आला आहे.

पीडित महिला ही पुण्यातील सहकारनगर परिसरात आपल्या कुटुंबीयांसोबत राहते. या महिलेला तिच्या ओळखीच्या ३६ वर्षीय आरोपीने त्याच्या कारमध्ये बसवत कर्जतच्या जंगलात नेले आणि त्याठिकाणी तिच्यावर अत्याचार करण्याचा प्रयत्न केला. आरोपीने पीडित महिलेला हाताने मारहाण करत दोन दिवस घरात डांबून ठेवले. कर्जत येथील जंगलात नेत तिच्यावर जबरदस्ती करत तिच्या गळ्यातील मंगळसूत्र तोडून अत्याचाराचा प्रयत्न केला. या घटनेमुळे पुणे हादरले आहे.

दरम्यान, पुण्यामध्ये वाडिया कॉलेजमध्ये विद्यार्थिनीवर सामूहिक बलात्कार, बोपदेव घाटामध्ये तरुणीवर सामूहिक बलात्कार, शाळकरी मुलींवर स्कूलव्हॅनमध्ये लैंगिक अत्याचार या घटना घडल्या असताना ही धक्कादायक घटना घडली आहे. गुन्हेगारांना पोलिसांचा धाक राहिला नसल्याचे चित्र वारंवार पुण्यात दिसून येत आहे. बोपदेव घाटामध्ये तरुणीवर झालेल्या सामूहिक बलात्कार प्रकरणातील आरोपी अजूनही मोकाट आहेत. पोलिस त्यांचा शोध घेत आहेत.