सचिन जाधव, साम प्रतिनिधी

पुण्यात वाघोलीतमधील एका बहुमजली अपार्टमेंटमध्ये एका १८ वर्षीय तरुणीने आत्महत्या केल्याची घटना घडली आहे. इमारतीच्या आठव्या मजल्यावरून खाली उडी मारून तरुणीने आत्महत्या केली. ही घटना भावडी रोडवरील एका सोसायटीमध्ये घडली.

हाती आलेल्या माहितीनुसार,ही घटना दुपारी १२.३० वाजण्याच्या सुमारास घडली. सारा लालमन अंधारे ( वय १८, सध्या रा. वाघोली, मूळ रा. करमाळा, ता. सोलापूर ) ही तरुणी १२.३० च्या सुमारास एका लिफ्टने इमारतीच्या आठव्या मजल्यावर आली. तिथे तिने आपले बूट काढले आणि सरळ खाली उडी टाकली. ती खाली पडल्यानंतर धपकाक असा मोठा आवाज झाला.

मोठा आवाज झाल्याने सोसायटीतील नागरिकांचे लक्ष गेलं. त्यावेळी त्यांना सारा ही रक्ताच्या थारोळ्यात पडलेली दिसली. त्यांनी त्वरित पोलिसांना कळवून तिला खासगी रुग्णालयात नेलं, मात्र डॉक्टरांनी तिला मृत घोषित केलं. ती ११ वी इयत्तेत शिकत होती. ती मूळची सोलापूर जिल्ह्यातील करमाळा येथील राहणारी होती. वर्षभरापासून ती आपल्या आईसह मामाकडे राहत होती. ही घटना दुपारी १२.३० वाजण्याच्या सुमारास भावडी रोड वरील एका सोसायटी मध्ये घडली.

घटनेची माहिती मिळताच वाघोलीचे वरिष्ठ पोलिस निरीक्षक नंदकुमार गायकवाड यांनी कर्मचाऱ्यांसह घटनास्थळी धाव घेतली. रागाच्या भरात तिने आत्महत्या केल्याचा प्राथमिक अंदाज असल्याचं त्यांनी सांगितले. परंतु तिने अजून कोणत्या कारणामुळे आत्महत्या केली का याचा तपास केला जातोय.