• पुण्यामध्ये ९ वर्षीय मुलीवर लैंगिक अत्याचार

• चुलत आजोबाकडून भयंकर कृत्य

• पोलिसांनी आरोपीविरोधात गुन्हा दाखल करत केली अटक

• या घटनेमुळे पुणे पुन्हा हादरले

सागर आव्हाड, पुणे

पुण्यातील येवलेवाडी परिसरात एका ९ वर्षीय मुलीवर लैंगिक अत्याचार करण्यात आल्याची धक्कादायक घटना समोर आली आहे. मुलीच्या चुलत आजोबांकडून लैंगिक अत्याचार करण्यात आल्याची माहिती समोर आली आहे. यासंदर्भात येवलेवाडी पोलिस ठाण्यामध्ये गुन्हा दाखल करण्यात आला असून नराधम आजोबाला पोलिसांनी अटक केली आहे. पीडीत कुटुंब हे मूळचे नेपाळचे असून कामानिमित्त पुण्यात राहत आहेत.

मिळालेल्या माहितीनुसार, एका ७० वर्षीय वृद्धाने आपल्या ९ वर्षीय नातीवर लैंगिक अत्याचार केले. घरात कुणी नसल्याचा फायदा घेत आरोपीने हे कृत्य केले. आरोपी पीडित मुलीचा चुलत नातेवाईक आहे. या प्रकरणी लोहगाव पोलिस ठाण्यात गुन्हा दाखल करण्यात आला आहे. पोलिसांनी आरोपीला अटक केली आहे.

पोलिसांनी दिलेल्या माहितीनुसार, पीडित मुलीच्या कुटुंबीयांनी दिलेल्या तक्रारीनंतर पोलिसांनी कारवाई करत आरोपीविरुद्ध विनयभंग केल्याप्रकरणी शुक्रवारी गुन्हा दाखल केला आहे. आरोपीला अटक करण्यात आली आहे. पोलिसांकडून आरोपीची चौकशी सुरू असून घटनेमागील नेमकी परिस्थिती जाणून घेण्याचे काम सुरू आहे. या घटनेमुळे पुण्यात खळबळ उडाली आहे.

दरम्यान, पुणे जिल्ह्यातल्या भोर तालुक्यातील नसरापूर येथे अल्पवयीन मुलीवर झालेल्या अत्याचार आणि हत्येच्या घटनेनंतर समाजात संताप व्यक्त केला जात आहे. असे असतानाच शहरात एका वृद्धाकडून अल्पवयीन मुलीवर अत्याचाराचा प्रयत्न केल्याची ही धक्कादायक घटना समोर आली आहे. याआधी देखील पुण्यात एका अल्पवयीन मुलीवर तिच्या आजोबाने बलात्कार केला होता. या प्रकरणातील आरोपी सध्या पोलिस कोठडीत आहे.