पुण्यातील नाना पेठ परिसरात गणेश विसर्जनाच्या पूर्वसंध्येला आयुष कोमकरची गोळी झाडून हत्या करण्यात आली होती. या प्रकरणी गुन्हे शाखेतील पोलिसांनी फरार आरोपी मुनाफ पठाणला ताब्यात घेतलं आहे. आज त्याला न्यायालयात हजर करण्यात येणार असल्याची माहिती समोर आली आहे. गुन्हे शाखेनं फरार आरोपीला बेड्या ठोकल्या आहेत. मुनाफ पठाणने पिस्तुल पुरवले असल्याची माहिती पोलीस तपासातून उघड झाली आहे. या प्रकरणी पोलिसांकडून अधिक तपास सुरू आहे.

आयुष कोमकरला ठार मारण्यासाठी पिस्तुल पुरवल्याचा आरोप मुनाफ पठाण याच्यावर आहे. त्यामुळे या हत्याकांडात पठाणचाही सहभाग असल्याचं निष्पन्न झालं आहे. मिळालेल्या माहितीनुसार, मुनाफ पठाण हा कुख्यात गुंड आणि शुटर कृष्णा आंदेकर याचा जवळचा सहकारी असल्याची माहिती आहे.

दरम्यान, वनराज आंदेकर यांच्या खुनाचा बदला घेण्यासाठी रचलेल्या कटातही पठाणचा सहभाग असल्याची माहिती समोर आली आहे. मंगळवारी पुणे पोलिसांसमो कृष्णा आंदेकर शरण गेला. सध्या बंडु आंदेकरच्या टोळीचे सर्वच जण पोलिसांच्या तावडीत आहेत.

आयुष कोमकर हत्या प्रकरणात मोठी अपडेट

आयुष कोमकर हत्या प्रकरणात वनराज आंदेकर याची पत्नी तसेच कृष्णा आंदेकर याची पत्नी दोघींना चौकशीसाठी पोलिसांनी ताब्यात घेतलं आहे. सोनाली आंदेकर आणि प्रियंका आंदेकर सध्या तपासासाठी पोलिसांच्या ताब्यात आहेत. चौकशीसाठी समर्थ पोलिसांनी त्यांना बोलावून घेतलं आहे. सध्या दोघींची गुन्हे शाखेकडून चौकशी सुरू आहे.

कृष्णा आंदेकर पोलिसांसमोर शरण गेला

बंडु आंदेकरचा मुलगा आणि वनराज आंदेकरचा भाऊ कृष्णा आंदेकर सध्या पोलिसांसमोर शरण गेला आहे. बंडु आंदेकरसह १२ जणांना न्यायालयात हजर करण्यात आले. त्यावेळेस 'कृष्णा आंदेकरची माहिती दे, नाहीतर गोळ्या झाडू', अशी धमकी पोलिसांनी दिल्याचं न्यायालयात बंडू आंदेकरनं सांगितलं. मात्र, बंडु आंदेकरनं केलेले सर्व आरोप तपास अधिकाऱ्यांनी फेटाळून लावले. कृ्ष्णा आंदेकरला याची माहिती मिळताच त्यांनं पोलिसांसमोर आत्मसमर्पण केलं.