अक्षय बडवे, साम टीव्ही

पुणे : पुण्यात 'कोयता गँग'नंतर आणखी एका टोळीने एन्ट्री मारली आहे. पुण्यातील नव्या टोळीने धूमाकूळ घातला आहे. पुण्यात घरफोड्या आणि वाहन चोरी करणाऱ्या टोळीमुळे नागरिक दहशतीत आहेत. पुण्यातील नव्या टोळीने शहरातील विविध भागात घरफोड्या केल्या आहेत. याच टोळीवर पोलिसांनी मोठी कारवाई केली आहे.

पुण्यात घरफोड्या आणि वाहन चोरी करणाऱ्या या 'बारक्या टोळी'च्या मुसक्या पोलिसांनी आवळल्या आहेत. पुणे पोलिसांच्या गुन्हे शाखेने कारवाई केली आहे. पोलिसांनी पुणे शहरातील जवळपास सहा वेगवेगळे गुन्हे उघडकीस आणले आहेत. आरोपींकडून सोन्याच्या दागिन्यांसह चार मोटरसायकल जप्त करण्यात आल्या आहेत.

पोलिसांनी बारक्या टोळीकडून लाखोंचा मुद्देमाल जप्त केला आहे. पोलिसांकडून १० लाख ३२ हजार रुपयांचे सोन्याचे दागिने तर दोन लाख ४० हजार रुपयांच्या गाड्या जप्त करण्यात आल्या आहेत. पोलिसांनी 'बारक्या टोळी'च्या पृथ्वीराज उर्फ साहिल संतोष आव्हाड, आनंद लोंढे, आर्यन आगलाव, कुलदीप सोनवणे आणि एका अल्पवयीन तरुणाला पोलिसांनी अटक केली आहे.

उल्हासनगरमध्ये रिक्षा चालकावर चॉपरने हल्ला

उल्हासनगरच्या आशेळे पाडा भागात शनिवारी सायंकाळी रिक्षा चालकावर टोळक्याने चॉपरने हल्ला झाल्याची घटना घडली आहे. रिक्षा चालकावरील चॉपरचा हल्ला सीसीटीव्हीत कैद झाला आहे. विठ्ठलवाडी पोलिसांनी चॉपर हल्ला प्रकरणी दोघांना अटक केली आहे.