गोपाळ मोटघरे, साम टीव्ही, प्रतिनिधी

वैष्णवी हगवणे मृत्यू प्रकरणामुळे महाराष्ट्रात संतापाची लाट उसळली आहे. या प्रकरणी पोलिसांनी वैष्णवीच्या सासरच्या मंडळीला अटक केली आहे. हुंड्यापायी वैष्णवीचा जीव गेला असे म्हटले जात आहे. हुंडाबळीचे हे प्रकरण ताजे असताना पुण्यातून अशीच एक घटना उघडकीस आली आहे. सासरी होणाऱ्या छळाला कंटाळून विवाहितेने आत्महत्या केल्याचे समोर आले आहे.

मिळालेल्या माहितीनुसार, पुण्यातील पिंपरी तालुक्यातील म्हाळुंगे येथे सदर घटना घडली. पूजा निर्वळ या २२ वर्षीय विवाहित महिलेने हुंड्यासाठी होणाऱ्या छळाला कंटाळून आत्महत्या केली होती. महिलेच्या मृत्यूप्रकरणी तिचा पती गजानन निर्वळ आणि नणंद राधा यांच्या विरोधात छळ केल्याप्रकरणी हुंडाबळीचा गुन्हा दाखल करण्यात आला होता.

लग्न झाल्यानंतर पाचव्या महिन्यातच पूजाने आत्महत्या केली होती. दुचाकी घेण्यासाठी ५० हजार रुपये दिले नाही म्हणून छळ केल्याचा आरोप पूजाच्या माहेरकडच्यांनी केला आहे. आमच्या मुलीची आत्महत्या झाली नसून तिची आत्महत्या झाल्याचेही तिच्या नातेवाईकांनी म्हटले आहे. या प्रकरणात पोलीस सहकार्य करत नसल्याचा आरोप त्यांनी केला आहे.

२२ वर्षीय पूजा निर्वळने एका महिन्यापूर्वी आत्महत्या केली होती. हुंडाबळीचा गुन्हा दाखल करुन सुद्धा अजूनही आरोप मोकाट फिरत आहेत. घटनेला एक महिन्यापेक्षा जास्त कालावधी पूर्ण झाला असूनही आरोपी फरार असल्याने पोलिसांचा हलगर्जीपणा उघड झाल्याचे म्हटले जात आहे. तर दुसऱ्या बाजूला गुन्ह्याची नोंद करण्यात आली आहे, या प्रकरणाचा तपास सुरु असल्याचे पोलिसांनी म्हटले आहे.