प्रसिद्ध अभिनेत्रीचा संसार मोडला; लग्नानंतर अवघ्या ४ वर्षांनी झाले वेगेळे

साऊथ आणि बॉलिवूडची प्रसिद्ध अभिनेत्री हंसिका मोटवानी तिच्या वैयक्तिक आयुष्यामुळे चर्चेत आली आहे. हंसिका आणि पती सोहेल कथूरिया या दोघांचा घटस्फोट झालाय. दोघांचं लग्न डिसेंबर २०२२ मध्ये झालं होतं. दोघे लग्नाच्या ४ वर्षांनंतर एकमेकांशी वेगळे झाले आहेत. मुंबईतील वांद्रे कोर्टाने दोघांचा घटस्फोटाला मंजुरी दिली, अशी माहिती समोर आली आहे.

हंसिकाने सोहेल यास पॅरिसमध्ये लग्नासाठी प्रपोज केला होता. २०२२ साली डिसेंबरमध्ये जयपूरच्या मुंडोता फोर्टमध्ये दोघांचे लग्न झालं. त्यांच्या लग्नाचा क्षण हा 'हंसिका लव्ह शादी ड्रामा' नावाच्या वेबसीरीजच्या माध्यामातून चाहत्यांना पाहायला मिळाला.

हंसिका मोटवानीचे वकील अदनान शेख यांनी सांगितलं की, दोघांचे वैचारिक मतभेद वाढले होते. दोघांचे करिअर वेगवेगळ्या क्षेत्रातील असल्याने त्यांच्या नात्यातील दुरावा वाढत होता'. हंसिका आणि सोहेल यांनी अद्याप अधिकृतरित्या वेगळे झाल्याची घोषणा केलेली नाही. परंतु दोघांचे सोशल मीडियावर एकत्र फोटो दिसणे कमी झाल्याने चर्चांना उधाण आलं आहे.

हंसिका आणि सोहेल यांचं नाते खरंतर वादातून सुरू झालं. कारण सोहेल कथूरिया याची हंसिका ही दुसरी बायको होती. त्याच्या पहिल्या पत्नीचे नाव रिंकी बजाज होते. ती हंसिकाची चांगली मैत्रीण होती. हंसिका आणि सोहेलच्या लग्नाची बातमी समोर आली. त्यावेळी तिच्यावर मैत्रीणीचं घर फोडल्याचा आरोप झाला. परंतु हंसिकाने आरोप फेटाळून लावले होते.