महानगर गॅसचे कनेक्शन बंद होणार सांगत व्यापारी अरुण मोरे यांची १४.४६ लाखांची फसवणूक

ऑनलाईन १२ रुपये पाठवा असा बहाणा केला, त्यानंतर खात्यातून पैसे लंपास

दोन महिलांना ‘ई-चलन’ आणि APK लिंक पाठवून ४ लाखांचा गंडा

रामनगर आणि टिळकनगर पोलीस ठाण्यात गुन्हे दाखल; नागरिकांना सावध राहण्याचे आवाहन

संघर्ष गांगुर्डे, साम टीव्ही

डोंबिवलीत सायबर गुन्हेगारांनी ‘महानगर गॅसचे जुने कनेक्शन बंद होणार’ असे सांगत एका कपडा व्यापाऱ्याची तब्बल १४ लाख ४६ हजार ९८९ रुपयांची फसवणूक केल्याचा धक्कादायक प्रकार उघडकीस आलाय. अरुण भगवान मोरे असे फसवणूक झालेल्या व्यापाऱ्याचे नाव आहे. ते डोंबिवली पूर्वेतील गोपाळनगर परिसरात कुटुंबासह राहतात.मोरे हे कपड्यांच्या विक्रीसह पेंटिंग व चायनीज पदार्थ विक्रीचा व्यवसाय करतात.

पोलिसांत दिलेल्या तक्रारीनुसार, काही दिवसांपूर्वी दिनेश जोशी नावाच्या व्यक्तीने त्यांना फोन करून स्वतःला महानगर गॅस कंपनीचा कर्मचारी असल्याचे सांगितले. नवीन गॅस लाईन टाकण्यात येणार आहे. त्यासाठी सध्याचे कनेक्शन बंद होणार आहे. प्रक्रिया पूर्ण करण्यासाठी ऑनलाईन माध्यमातून १२ रुपये पाठवा, असे कर्मचाऱ्याने सांगितलं.

मोरे यांना संशय आल्याने त्यांनी कोणतीही बँक माहिती दिली नाही. तसेच त्या व्यक्तीला पुन्हा संपर्क करू नका, अन्यथा पोलिसांत तक्रार करीन, अशी तंबीही दिली. त्यानंतर रात्रीच्या सुमारास त्यांच्या मोबाईलवर बँक खात्यातून पैसे काढल्याचा मेसेज मोबाईलमध्ये आले. वेगवेगळ्या आठ व्यवहारांद्वारे त्यांच्या खात्यातून १४ लाख ४६ हजार ९८९ रुपये काढून घेण्यात आल्याचे समोर आले. परंतु कोणताही व्यवहार केला नसतानाही मोठी रक्कम खात्यातून वळती झाली. त्यामुळे मोरे यांना मोठा धक्का बसला.

सुनीलनगर परिसरात राहणाऱ्या दोन महिलांचीही अशीच फसवणूक झाली होती. ४५ वर्षीय महिलेला गॅस कनेक्शन बंद होईल, अशी भीती दाखवत १० रुपयांचे ई-चलन भरण्याची लिंक पाठवण्यात आली होती. त्यानंतर मोबाइलवर पाठवलेल्या लिंकवर क्लिक केल्यानंतर खात्यातून २ लाख ९९ हजार ५०० रुपये काढून घेण्यात आलेत. तर दुसऱ्या ५६ वर्षीय महिलेला APK लिंक पाठवली. त्या महिलेला जवळपास १ लाख रुपयांचा गंडा घालण्यात आला होता.

दोन्ही महिलांची सुमारे ४ लाख रुपयांची ऑनलाईन फसवणूक करण्यात आलीये. या प्रकरणी संबंधित महिलांनी रामनगर पोलीस ठाण्यात गुन्हा दाखल केला. तर व्यापारी अरुण मोरे यांनी टिळकनगर पोलीस ठाण्यात तक्रार दाखल केली आहे. पोलिसांकडून अज्ञात आरोपीविरोधात गुन्हा नोंदवण्यात आला आहे. अमेरिका–इराण तणावामुळे गॅस टंचाईच्या चर्चांनी नागरिकांमध्ये भीतीचे वातावरण निर्माण झालं आहे. सायबर चोरटे त्याचाच फायदा घेत असल्याचे दिसून येत आहे. त्यामुळे अशा प्रकारचे फोन कॉल, लिंक किंवा मेसेज आल्यास सावध राहण्याचे आवाहन पोलिसांनी नागरिकांना केलंय.