Summary:

• नवी मुंबईत स्पा सेंटरच्या नावाखाली वेश्याव्यवसाय

• या प्रकरणी पोलिसांनी नवरा-बायकोला केली अटक

• आरोपी गरजू महिलांचा गैरफायदा घ्यायचे

नवी मुंबई पोलिसांनी स्पा सेंटरवर छापा टाकत सेक्स रॅकेटचा पर्दाफाश केला. नवी मुंबईतल्या कळंबोलीमध्ये ही कारवाई करण्यात आली. स्पा सेंटरमध्ये वेश्या व्यवसाय सुरू असल्याची गुप्त माहिती पोलिसांना मिळाली होती. या माहितीच्या आधारे पोलिसांनी स्पा सेंटरवर छापा टाकला. यावेळी महिला आणि पुरूषाला पोलिसांनी नको त्या अवस्थेत पकडलं. या प्रकरणी पोलिसांनी नवरा-बायकोला अटक केली.

स्पा सेंटरच्या नावाखाली चालणाऱ्या वेश्याव्यवसाय रॅकेटवर पोलिसांनी मोठी कारवाई केली. रोडपाली येथील गोल्डन किंग स्पावर छापा टाकत उत्तराखंडमधील एका जोडप्याला पोलिसांनी अटक केली. कळंबोलीतील या स्पा सेंटरवर अनैतिक मानवी वाहतूक प्रतिबंधक कक्षाने ही कारवाई केली. या कारवाईमुळे कळंबोलीत खळबळ उडाली आहे.

रोडपाली येथील गोल्डन किंग सलून अँड स्पावर पोलिसांनी छापा टाकला असता त्या ठिकाणी बॉडी मसाजच्या नावाखाली मुलींना वेश्याव्यवसायात ढकलले जात होते. पोलिसांनी या स्पाचा चालक समीर उर्फ ​​अन्सारी आणि त्याची बायको ​​सलमा अन्सारी या दोघांना अटक केली. यावेळी पोलिसांनी एका पीडित महिलेची सुटका केली.

पोलिसांनी बनावट ग्राहक पाठवून या सेक्स रॅकेटचा पर्दाफाश केला. पोलिसांनी अटक केलेले आरोपी नवरा-बायको हे गरजू महिलांना पैशाचे आमिष दाखवून त्यांच्याकडून हे काम करून घेत होते. दोघेही या व्यवसायातून मिळणाऱ्या पैशातून उपजिविका करत होते. पोलिस सध्या या प्रकरणाचा तपास करत असून अजून कुणाचा सहभाग आहे की नाही याचा शोध घेत आहेत.