विकास मिरगणे, साम टीव्ही, प्रतिनिधी

नवी मुंबईमधील ऐरोलीमधून धक्कादायक प्रकार समोर आला आहे. ऐरोली सेक्टर ३ येथे एका खासगी कॉम्प्युटर क्लासेस चालवणाऱ्याने क्लासमधील शिक्षिकेचा विनयभंग केल्याची माहिती उघडकीस आली आहे. या प्रकरणातील आरोपीला अटक करण्यात आली आहे. या प्रकारामुळे ऐरोली परिसरामध्ये मोठी खळबळ उडाली आहे.

मिळालेल्या माहितीनुसार, विद्यार्थ्यांना कॉम्प्युटरचे मूलभूत शिक्षण देण्यासाठी आलेल्या शिक्षिकेवर कॉम्प्युटर क्लासेसचा मालक संदीप याने विनयभंग केला आहे. पीडित शिक्षिकेने याबाबत रबाळे पोलीस ठाण्यात तक्रार देखील केली. पीडितेच्या तक्रारीनंतर पोलिसांनी तात्काळ गुन्हा दाखल केला आणि आरोपीला बेड्या ठोकल्या.

कॉम्प्युटर क्लासमध्ये शिक्षिकेचा विनयभंग होत असेल, तर विद्यार्थ्यांच्या सुरक्षेचे काय? असा प्रश्न पालकांमध्ये उपस्थित होत आहे. या प्रकरणातील आरोपी संदीपला पोलिसांनी अटक केली आहे. आरोपीने क्लासमधील इतर कोणत्या महिलेसोबत काही गैरकृत्य केले आहे का याचा शोध सध्या रबाळे पोलीस घेत आहेत.

ऐरोली सेक्टर ३ येथील एसआयटी या खासगी कॉम्प्युटर क्लासेसमध्ये एका महिला शिक्षिकेवर विनयभंग झाल्याची माहिती समोर आली आहे. धक्कादायक बाब अशी की, क्लासेसचा मालक संदीप यानेच शिक्षिकेवर अत्याचार केले आहेत. शिक्षिकेने पोलीस ठाण्यात तक्रार केली असून पोलिसांनी क्लासमालकाविरोधात कारवाई केली आहे.