संघर्ष गांगुर्डे, साम टीव्ही

सोशल मीडियावर कॉकरोच पक्ष म्हणून ओळखल्या जाणाऱ्या पक्षाच्या वाढत्या फॉलोअर्सची सर्वत्र चर्चा सुरू असताना, त्यावरून शिवसेना शिंदे गटाच्या कार्यकर्ता मेळाव्यातही राजकीय टोलेबाजी पाहायला मिळाली. कल्याणजवळील कांबा परिसरात आयोजित मेळाव्यात बोलताना खासदार नरेश म्हस्के यांनी नाव न घेता विरोधकांवर निशाणा साधत आपल्या कार्यकर्त्यांनाच सवाल केला.

चार दिवसांत एखाद्याचे मिलियन फॉलोअर्स झाले, याची चर्चा आपण करतो. पण ते फॉलोअर्स वाढले कारण लोकांनी त्यांचे अकाउंट फॉलो केले, पोस्ट लाईक केल्या. मग आपल्या नेत्यांच्या आणि पक्षाच्या अधिकृत सोशल मीडिया अकाउंटला आपण कधी फॉलो करणार? असा सवाल त्यांनी उपस्थित केला. यावेळी त्यांनी कार्यकर्ते आणि पदाधिकाऱ्यांनाही आत्मपरीक्षण करण्याचा सल्ला दिला. येथील दहा टक्के लोकांनीसुद्धा शिंदे साहेब किंवा शिवसेना पक्षाचे अधिकृत अकाउंट फॉलो केले नसतील,असे म्हणत त्यांनी सोशल मीडियावरील सक्रियतेवर भर दिला.

राजकारणात सोशल मीडियाचे वाढते महत्त्व लक्षात घेता, कार्यकर्त्यांनी केवळ विरोधकांच्या फॉलोअर्सची चर्चा न करता आपल्या पक्षाची डिजिटल ताकद वाढवण्यासाठी पुढे यावे, असे आवाहनही त्यांनी केले. खासदार म्हस्के यांच्या या वक्तव्याची राजकीय वर्तुळात जोरदार चर्चा सुरू असून, कॉकरोच पक्ष या उल्लेखावरून आता नव्या राजकीय प्रतिक्रिया उमटण्याची शक्यता व्यक्त केली जात आहे.