Thane News: गेल्या काही तासांपासून मुंबईसह ठाण्यात जोरदार पाऊस कोसळत आहे. ठाणे जिल्ह्यातील काही भागातही पावसाची संततधार सुरू आहे. कालपासून सुरू असलेल्या या पावसामुळे मंगळवारी पहाटे मुंब्रा बायपास रस्त्यावर दरड कोसळली. त्यानंतर आज पुन्हा या बासपास रस्त्यावर दरड कोसळण्याची घटना घडली आहे. दरड कोसळल्याने वाहतुकीवर परिणाम झाला आहे. (Latest Marathi News)

मिळालेल्या माहितीनुसार, ठाण्यातील मुंब्रा परिसरातील मुंब्रा बायपास येथील दुसऱ्यांदा दरड कोसळल्याची घटना घडली आहे. ४ दिवसांपासून पडत असलेल्या संततधार पावसामुळे दरड कोसळल्याची घटना घडली. सलग दुसऱ्या दिवशी मुंब्रा बायपास येथील खडी मशीन रोडजवळ पुन्हा एकदा दरड कोसळली आहे.

बुधवारी दुपारी ३ वाजण्याच्या सुमारास ही घटना घडली आहे. सुदैवाने या घटनेत कुठलीही जीवितहानी किंवा दुखापत झाली. तसेच दरड ठाण्याच्या येणाऱ्या मार्गावर आली आहे. त्यामुळे वाहतूक धीम्या गतीने सुरु आहे

काल पहाटेच्या सुमारास देखील मुंब्रा बायपास येथील हनुमान मंदिर जवळ अशाच प्रकारे दरड कोसळली होती. त्यानंतर आज दरड कोसळल्याची माहिती मिळताच घटनास्थळी वाहतूक विभागाचे कर्मचारी, मुंब्रा प्रभाग समिती आपत्ती व्यवस्थापन कक्षाचे कर्मचारी ०१-पिकअप वाहन, अग्निशमन दलाचे जवान ०१-फायर वाहनासह उपस्थित झाले आहेत. रस्त्यावर आलेल्या दरड चा मलबा काढण्याचं काम युद्धपातळीवर सुरु आहे.

आंबेनळी घाटात दरड कोसळली

रायगडमधील आंबेनळी घाटातही आज दरड कोसळली. मंगळवारी रात्री आणि बुधवारी सकाळी दरड कोसळल्याने पोलादपूर-महाबळेश्वर मार्गावरील वाहतूक ठप्प झाली होती. संबंधित यंत्रणांच्या शर्थीच्या प्रयत्नानंतर ही वाहतूक पूर्ववत झाली. पण त्यानंतर पुन्हा एक किलोमीटरवर दरड कोसळली आहे. डोंगरावरील मातीचा ढिगारा थेट रस्त्यालगत आला आहे.