डिसेंबर महिन्यातील तिसऱ्या आठवड्याच्या शेवटी लागोपाठ सुट्ट्या आल्या आहेत. यानिमित्ताने पर्यटक पर्यटनाचा आनंद घेण्यासाठी विविध ठिकाणी भेट देतील. मात्र जर तुम्ही येत्या २६ आणि २७ डिसेंबर रोजी लोकलमधून प्रवास करणार असाल, तर त्याआधी ही बातमी वाचा. पश्चिम रेल्वेवरील कांदिवली – बोरिवलीदरम्यान सुरू असलेल्या सहाव्या रेल्वे मार्गाच्या कामामुळे २७ डिसेंबर रोजी पश्चिम रेल्वेवरील ३०० लोकल फेऱ्या रद्द करण्यात येणार आहेत. त्याचा फटका प्रवाशांना बसणार आहे. शिवाय पनवेल येथे ३० डिसेंबर पर्यंत रेल्वे ब्लॉक असणार आहे.

पश्चिम रेल्वेवरील वांद्रे टर्मिनस – बोरिवलीदरम्यान सहाव्या मार्गिकेचे काम अंतिम टप्प्यात आहे. कांदिवली – बोरिवलीदरम्यान पायाभूत कामे हाती घेण्यात आली आहेत. यासाठी २० डिसेंबरपासून पुढील ३० दिवस वाहतूक ब्लाॅक घेण्यात आला आहे. हा ब्लॉक १८ जानेवारी २०२६ पर्यंत आहे. या ब्लॉकमुळे २६ डिसेंबर रोजी रात्री ११ पासून २७ डिसेंबर रोजी सकाळी ७ पर्यंत अप आणि डाऊन धीम्या मार्गावर बोरिवली येथे इलेक्ट्रॉनिक इंटरलॉकिंग पॅनल कार्यान्वित करण्यासाठी एक मोठा नॉन-इंटर लॉकिंग ब्लॉक घेण्यात येणार आहे.

तसेच २६ डिसेंबर रोजी रात्री ११ पासून २७ डिसेंबर रोजी मध्यरात्रीपर्यंत कांदिवली – दहिसरदरम्यान डाऊन जलद मार्गावर वेगमर्यादा लागू करण्यात येणार आहे. या ब्लॉकमुळे लोकल फेऱ्या रद्द करण्यात येणार आहेत. तसेच बोरिवली आणि अंधेरीच्या काही लोकल गोरेगावपर्यंतच धावतील, अशी माहिती पश्चिम रेल्वे प्रशासनाने दिली.

या मार्गावरील सुमारे ३०० लोकल फेऱ्या २७ डिसेंबर रोजी रद्द करण्यात येतील. यामध्ये अप, डाऊन, जलद, धीम्या लोकल सेवांचा समावेश असेल. तर, बोरिवलीपर्यंत धावणाऱ्या १४ लोकल फेऱ्या गोरेगावपर्यंत चालवल्या जातील. ब्लॉक कालावधीत अंधेरीच्या काही लोकल सेवा फक्त गोरेगावपर्यंतच धावतील. त्यामुळे प्रवाशांची प्रचंड गैरसोय होण्याची शक्यता आहे. नवीन वर्षाच्या सेलिब्रेशनसाठी बाहेरगावी जाणाऱ्या आणि मुंबईत फिरायला येणाऱ्या पर्यटकांना या ब्लॉकचा फटका बसण्याची चिन्हे आहेत.