वाढते तापमान आणि उकाड्यामुळे हैराण झालेले नागरिक पावसाची आतुरतेने वाट पाहत आहेत. मान्सून (Monsoon 2024) येत्या काही तासांमध्येच मुंबईमध्ये (Mumbai Rain) दाखल होण्याचा अंदाज आहे. त्यामुळे नागरिक आनंदी आहेत. अशामध्ये ठाणे आणि नवी मुंबईमध्ये मान्सूनपूर्व पावसाला सुरूवात झाली आहे. काही ठिकाणी रिमझिम तर काही ठिकाणी जोरदार पाऊस पडत आहे. अचानक आलेल्या पावसामुळे नागरिकांची तारंबळ उडाली. पण या पावसामुळे हवेत गारवा निर्माण झाला आहे. त्यामुळे उकाड्याने हैराण झालेल्या नागरिकांना दिलासा मिळाला.

मिळालेल्या माहितीनुसार, आज सकाळपासून ठाणे शहरात ढगाळ वातावरण होते. काही वेळापूर्वी ठाण्यामध्ये रिमझिम पावसाला सुरुवात झाली. उकाड्यामुळे ठाणेकर हैराण झाले होते. पण या पावसामुळे वातावरणात गारवा निर्माण झाल्यामुळे ठाणेकर आनंदी झाले आहेत. तर दुसरीकडे नवी मुंबईमध्ये देखील मान्सूनपूर्व पावसाला सुरूवात झाली आहे. बेलापूर, खारघर, खांदा कॉलनी आणि नवी पनवेलमध्ये पाऊस पडत आहे. काही ठिकाणी चांगलाच पाऊस पडत आहे. या पावसामुळे वातावरणात थंडावा निर्माण झाला आहे.

सिंधुदुर्ग जिल्ह्याच्या किनारपट्टी भागात मान्सूनपूर्व पावसाच्या सरी कोसळत आहेत. सकाळी १० वाजल्यापासून पाऊस पडत आहे. मालवण, वेंगुर्ले आणि सावंतवाडी तालुक्याच्या काही भागात पावसाला सुरुवात झाली आहे. या पावसामुळे हवेत गारवा निर्माण झाला आहे. अचानक आलेल्या या पावसामुळे सिंधुदुर्गकरांचा गोंधळ उडाला. हवामान विभागाकडून कोकणाला यलो अलर्ट देण्यात आला आहे.

तर हवामान खात्याने रत्नागिरी जिल्ह्यासाठी पुढील तीन दिवस यलो अलर्ट जारी केला आहे. पुढच्या तीन दिवसांमध्ये रत्नागिरी जिल्ह्यामध्ये विजांच्या कडकडाटासह जोरदार पाऊस पडेल असा इशारा हवामान खात्याने दिलेला आहे. त्याचबरोबर समुद्रामध्ये ताशी 30 ते 40 किलोमीटर असे वेगाने वारे वाहतील असा इशारा देण्यात आला आहे. नागरिकांनी काळजी घ्यावी असे देखील आवाहन करण्यात आले आहे.