Mumbai Malad Link Road Murder News मुंबईतील मालाडमध्ये भर रस्त्यात एका बाइकस्वाराची हत्या केल्याची धक्कादायक घटना घडली आहे. टॅक्सी चालकासोबत झालेल्या क्षुल्लक वादातून भर रस्त्यात राडा झाला. संतापलेल्या टॅक्सी चालकाने धारदार शस्त्राने बाईकस्वार तरुणाची हत्या केली. याप्रकरणी पोलिसांनी संबंधित टॅक्सी चालकाला आणि त्याच्या टॅक्सीमध्ये बसलेल्या प्रवाशाला ताब्यात घेतलं आहे.

मिळालेल्या माहितीनुसार, मृत तरुणाचे नाव शारिक अन्सारी (२५) असे असून तो एका डिजिटल मार्केटिंग कंपनीत काम करत होता. काल म्हणजेच १४ मार्च रोजी शनिवारी मालाडमधील इनॉर्बिट मॉलजवळील लिंक रोडवरून अंधेरीला जाताना अन्सारीचा मागून येणाऱ्या कॅब चालकाशी वाद झाला.

हा वाद इतका वाढला की, टॅक्सी चालकाने टॅक्सीमधून उतरून शारिक अन्सारीवर धारदार शस्त्राने वार केला. यामध्ये तरुण गंभीर जखमी झाला आणि जागीच कोसळला. अन्सारीला ताबडतोब जवळच्या रुग्णालयात नेण्यात आले, जिथे डॉक्टरांनी त्यांची तपासणी केली आणि त्यांना मृत घोषित केले.

घटनेची माहिती मिळताच बांगुर नगर पोलिसांनी घटनास्थळी धाव घेतली आणि आरोपीला ताब्यात घेतले. पोलिसांनी आरोपीविरुद्ध खुनाचा गुन्हा दाखल केला असून या प्रकरणाचा पुढील तपास सुरू आहे.