• मुंबई- पुणे एक्स्प्रेसवेवर कंटेनरची टेम्पोला धडक

• मुंबई लेनवर दोन वाहनांचा भीषण अपघात

• बोरघाटात दोन वाहने दरीत कोसळली

• कंटेनर चालकाचा अपघातात जागीच मृत्यू

दिलीप कांबळे, मावळ

मुंबई- पुणे एक्सप्रेस वेवर भीषण अपघात झाला. टेम्पोला पाठीमागून येणाऱ्या कंटेनरने जोरदार धडक दिली. ही धडक इतकी जोरदार होती की दोन्ही वाहनं अनियंत्रित होत दरीत कोसळली. या अपघातात एकाचा जागीच मृत्यू झाला तर एक जण गंभीर जखमी झाला. मुंबई- पुणे एक्सप्रेस वेवरील मुंबई लेनवर खोपोली हद्दीत हा अपघात झाला. या अपघाताचा तपास सध्या पोलिस करत आहेत.

मिळालेल्या माहितीनुसार, मुंबई-पुणे एक्स्प्रेसवेवर खंडाळा बोरघाटात आज दोन वाहनांचा विचित्र आणि भीषण अपघात झाला. मुंबई लेनवरील किलोमीटर क्रमांक 39 च्या दरम्यान मालवाहू कंटेनरने मागून टेम्पोला जोरदार धडक दिल्याची प्राथमिक माहिती आहे. धडकेनंतर दोन्ही वाहने नियंत्रणाबाहेर जाऊन बोरघाटातील दरीत कोसळली. या अपघातात कंटेनर खोल दरीत कोसळला यात कंटेनर चालकाचा दुर्दैवी मृत्यू झाला असून मृतदेह खोपोली नगरपालिका रुग्णालयात शवविच्छेदनासाठी नेण्यात आला आहे. मृत चालकाची ओळख अद्याप स्पष्ट झालेली नाही.

या अपघातात टेम्पोचा चालक मिराज शेख हा सुखरूप बचावला. अपघातामध्ये तो जखमी झाला आहे. अपघातानंतर टेम्पो वरतीच अडकल्यामुळे चालकाचा जीव वाचला. हा अपघात सकाळी ८.३० वाजताच्या सुमारास पुण्यावरून मुंबईला जाणाऱ्या लेनवर घडला. अपघाताची माहिती मिळताच IRB पेट्रोलिंग, देवदूत यंत्रणा, डेल्टा फोर्स, अ‍ॅफकॉन्स कंपनीची टीम, महाराष्ट्र सुरक्षा बल, लोकमान्य हॉस्पिटल आणि 108 रुग्णवाहिका, हेल्प फाऊंडेशनचे सदस्य तसेच बोरघाट महामार्ग वाहतूक पोलिसांचे अधिकारी आणि कर्मचारी घटनास्थळी दाखल झाले.

दोन्ही वाहने दरीत कोसळल्याने बचावकार्याला आव्हान निर्माण झाले. मात्र सध्या परिस्थिती नियंत्रणात असून द्रुतगती मार्गावरील वाहतुकीला कोणताही अडथळा निर्माण झाला नसल्याची माहिती आहे. या अपघातामागील नेमके कारण आणि पुढील तपास महामार्ग पोलिसांकडून करण्यात येत आहे. जखमी टेम्पो चालकावर सध्या रुग्णालयात उपचार सुरू आहेत.