>> निवृत्ती बाबर

मुंबई : मुंबई महानगरपालिकेच्या केईएम रुग्णालयात PBCF (Poor Box Charitable Fund) गरीब रुग्ण सहाय्यता निधीमध्ये मोठा भ्रष्टाचार झाल्याचे समोर आले आहे. याविषयी माजी विरोधी पक्षनेते रवी राजा यांनी आयुक्त इकबाल सिंग चहल यांना पत्र लिहलं आहे.

कोट्यावधी रूपये या फंडात जमा होतात आणि गरीब रूग्णांना यातून मदत केली जाते. 2017 पासूनच्या जुन्या केसेसमध्ये खोटी कागदपत्रे तयार करून या निधीवर डल्ला मारला गेलाय. यासाठी डिन, डेप्युटी डिन, एएमओ आणि युनिट हेड यांच्या बोगस सह्या आणि बोगस स्टॅम्प तयार करण्यात आले. (Latest Marathi News)

केवळ एका नोंद वहीत 65 लाखांचा भ्रष्टाचार उघड झालाय. ऊर्वरीत नोंदवहीतील व्यवहारांची कसून चौकशी केल्यास आणखी कोट्यावधी रुपयांचा घोटाळा समोर येऊ शकतो. या प्रकरणी पोलिसांत गुन्हा दाखल झाल्यानंतर सोनाली गायकवाड यांना अटकही झाली होती.

परंतु त्यांना वाचवण्याचे प्रयत्न वरिष्ठ स्तरावरून होत आहेत. केवळ एक कर्मचारी हा भ्रष्टाचार करू शकणार नाही, तर यामध्ये अनेक वरिष्ठ अधिकारी सुद्धा गुंतले असल्याची दाट शक्यता आहे. त्यामुळे या प्रकरणाची सखोल चौकशी करण्याची मागणी माजी विरोधी पक्षनेते रवी राजा यांनी केली आहे.