मध्य आणि ट्रान्स हार्बर रेल्वे मार्गावर येत्या २० एप्रिल २०२५ म्हणजे रविवारी मेगाब्लॉक घेण्यात येणार आहे. उपनगरीय विभागांवर विविध अभियांत्रिकी आणि देखभालीची कामे करण्यासाठी मेगा ब्लॉक घेण्यात येणार आहे. छत्रपती शिवाजी महाराज टर्मिनस मुंबई आणि विद्याविहार दरम्यान अप आणि डाऊन धीम्या मार्गावर सकाळी १०.५५ वाजल्यापासून ते दुपारी ३.५५ वाजेपर्यंत म्हणजे ५ तासांचा मेगाब्लॉक घेण्यात येणार आहे.

छत्रपती शिवाजी महाराज टर्मिनस मुंबई येथून सकाळी १०.४८ वाजल्यापासून ते दुपारी ३.४५ वाजेपर्यंत सुटणाऱ्या डाऊन धीम्या मार्गावरील लोकलसेवा छत्रपती शिवाजी महाराज टर्मिनस मुंबई आणि विद्याविहार स्थानकादरम्यान डाऊन जलद मार्गावर वळवल्या जातील. भायखळा, परळ, दादर, माटुंगा, शीव आणि कुर्ला रेल्वे स्थानकांवर लोकल थांबतील आणि विद्याविहार स्थानकावर डाऊन धीम्या मार्गावर पुन्हा वळवल्या जातील. ब्लॉक दरम्यान मशीद, सँडहर्स्ट रोड, चिंचपोकळी आणि करी रोड या स्थानकांवर लोकल थांबणार नाहीत.

घाटकोपर येथून सकाळी १०.१९ वाजल्यापासन ते दुपारी ३.५२ वाजेपर्यंत सुटणाऱ्या अप धीम्या मार्गावरील लोकल विद्याविहार आणि छत्रपती शिवाजी महाराज टर्मिनस मुंबई रेल्वेस्थानकादरम्यान अप जलद मार्गावर वळवल्या जातील. कुर्ला, शीव, माटुंगा, दादर, परळ आणि भायखळा रेल्वे स्थानकांवर लोकल थांबतील. ब्लॉक दरम्यान करी रोड, चिंचपोकळी, सँडहर्स्ट रोड आणि मशीद या रेल्वे स्थानकांवर मेगाब्लॉक दरम्यान लोकल थांबणार नाहीत.

डाऊन धिम्या मार्गावर मेगाब्लॉक सुरू होण्यापूर्वी सीएसएमटी रेल्वे स्थानकावरून शेवटची लोकल सकाळी १०.०७ वाजता सुटेल. ब्लॉक संपल्यानंतर पहिली लोकल सीएसएमटी रेल्वे स्थानकावरून दुपारी ३.५७ वाजता सुटेल. तर अप धीम्या मार्गावर मेगाब्लॉक पूर्वची शेटवची लोकल कल्याण रेल्वे स्थानकावरून सकाळी ९.१३ वाजता सुटेल. तर ब्लॉक संपल्यानंतरची पहिली लोकल कल्याण रेल्वे स्थानकावरून दुपारी ३.१० वाजता सुटेल.

तर, ठाणे आणि वाशी/नेरुळ दरम्यान अप आणि डाऊन ट्रान्स हार्बर मार्गावर सकाळी ११.१० वाजल्यापासून ते संध्याकाळी ४.१० वाजेपर्यंत तब्बल ५ तासांचा मेगाब्लॉक घेण्यात येणार आहे. ठाण्याहून वाशी/नेरुळ/पनवेल येथे जाणाऱ्या डाऊन हार्बर मार्गावरील लोकलसेवा सकाळी १०.३५ वाजल्यापासून ते संध्याकाळी ४.०७ वाजेपर्यंत रद्द राहतील. पनवेल/नेरुळ/वाशी ते ठाणे अप हार्बर मार्गावरील लोकलसेवा १०.२५ वाजता वाशी ते नेरुळ २.०९ वाजता रद्द करण्यात येतील. प्रवाशांना होणाऱ्या गैरसोयीबद्दल रेल्वे प्रशासनाला सहकार्य करावे अशी विनंती मध्ये रेल्वे प्रशासनाकडून करण्यात आली आहे.