Summary -

• धावत्या लोकलमधून फेकलेला नारळ डोक्याला लागून तरुणाचा मृत्यू झाला.

• संजय भोईर (२५) असं मृत्यू झालेल्या तरुणाचे नाव होते.

• नायगाव-भाईंदर रेल्वे स्थानकादरम्यानच्या खाडी पुलावर ही घटना घडली.

• उपचारादरम्यान मुंबईच्या नायर रुग्णालयात संजयचा मृत्यू झाला.

धावत्या लोकलमधून खाडीत फेकण्यात आलेल्या नारळ डोक्याला लागून एका तरुणाचा दुर्दैवी मृत्यू झाला. नायगाव- भाईंदर रेल्वे स्थानकादरम्यान असणाऱ्या खाडीजवळ घडली. तरुण कामाला जाण्यासाठी निघाला होता. वाटतेच त्याच्या डोक्यावर जोरात नारळ आदळला गेला. यामध्ये गंभीर जखमी झालेल्या तरुणावर रुग्णालयात उपचार सुरू होते. पण उपचारादरम्यान त्याचा मृत्यू झाला.

मिळालेल्या माहितीनुार, भाईंदरच्या खाडी पुलावरून जाणाऱ्या धावत्या लोकलमधून कुणी तरी निर्माल्याचा नारळ फेकला. हा नारळ डोक्याला लागून तरुण गंभीर जखमी झाला. या तरुणाचा उपचारादरम्यान मृत्यू झाला. संजय दत्ताराम भोईर (२५ वर्षे) असं मृत्यू झालेल्या तरुणाचे नाव आहे. संजयच्या मृत्यूमुळे कुटुंबीयांना मोठा धक्का बसला आहे. त्याच्या पाश्चात भाऊ आणि एक बहीण असा परिवार आहे. आई आणि वडिलांचा मृत्यू झाल्याने घराची सर्व जबाबदारी संजयवर होती. मात्र संजयच्या जाण्याने भोईर कुटुंबावर दुःखाचा डोंगर कोसळला आहे.

संजय नायगांवच्या पाणजू बेटावर राहणारा होता. शनिवारी सकाळी ८.३० वाजताच्या दरम्यान तो कामाला जाण्यासाठी निघाला होता. त्याच दरम्यान ही घटना घडली. प्राथमिक उपचारासाठी त्याला पालिकेच्या रुग्णालयात नेण्यात आले. मात्र डॉक्टरांनी पुढील उपचारासाठी त्याला मुंबईच्या नायर रुग्णालयात हलवण्यात सांगितले. पण नायार रुग्णालयात उपचारादरम्यान त्याचा मृत्यू झाला.

पाणूज बेट हे समुद्राच्या मध्यभागी असल्याने तेथील नागरिकांना बोटीवर अवलंबून रहावे लागते. मात्र, शनिवारी हवामान खराब असल्याने बोटी बंद होत्या. त्यामुळे संजयने नायगाव स्थानकाकडे पुलावरून पायी चालत जाण्याचा निर्णय घेतला. तो पुलावरून जात असताना धावत्या लोकलमधून एका प्रवाशाने निर्माल्य खाडीत फेकण्याच्या उद्देशाने नारळ फेकला. दुर्दैवाने तो नारळ थेट संजयच्या डोक्याला लागला आणि तो रक्त बंबाळ झाला. या घटनेत त्याचा मृत्यू झाला.