मध्य रेल्वेच्या मुंबई विभागात रविवार, २६ एप्रिल २०२६ रोजी विविध अभियांत्रिकी व देखभाल कामांसाठी हार्बर मार्गावर मेगा ब्लॉक घेण्यात येणार आहे. मात्र, छत्रपती शिवाजी महाराज टर्मिनस ते कल्याण या मध्य रेल्वेच्या मार्गिकेवर कोणताही मेगा ब्लॉक नसल्याने त्या मार्गावरील लोकल सेवा नियमितपणे सुरू राहणार आहेत.

हार्बर मार्गावरील हा मेगा ब्लॉक छत्रपती शिवाजी महाराज टर्मिनस (सीएसएमटी) ते चुनाभट्टी/वांद्रे या डाउन मार्गावर सकाळी ११.४० ते सायंकाळी ४.४० वाजेपर्यंत असेल. तसेच चुनाभट्टी/वांद्रे ते सीएसएमटी या अप मार्गावर सकाळी ११.१० ते सायंकाळी ४.१० वाजेपर्यंत ब्लॉक राहणार आहे. या कालावधीत अनेक लोकल सेवा रद्द करण्यात आल्या आहेत.

सीएसएमटीहून सकाळी ११.१६ ते सायंकाळी ४.४७ दरम्यान सुटणाऱ्या वाशी, बेलापूर आणि पनवेलकडे जाणाऱ्या डाउन हार्बर मार्गावरील गाड्या रद्द राहतील. त्याचप्रमाणे, सीएसएमटीहून सकाळी १०.४८ ते सायंकाळी ४.४३ दरम्यान सुटणाऱ्या वांद्रे व गोरेगावकडे जाणाऱ्या सेवा देखील रद्द असतील.

पनवेल, बेलापूर आणि वाशी येथून सकाळी ९.५३ ते दुपारी ३.२० दरम्यान सीएसएमटीकडे येणाऱ्या अप मार्गावरील गाड्या तसेच गोरेगाव आणि वांद्रे येथून सकाळी १०.४५ ते सायंकाळी ५.१३ दरम्यान सुटणाऱ्या सेवा रद्द करण्यात आल्या आहेत.

प्रवाशांची गैरसोय टाळण्यासाठी ब्लॉक कालावधीत पनवेल आणि कुर्ला (प्लॅटफॉर्म क्रमांक ८) दरम्यान दर २० मिनिटांनी विशेष लोकल सेवा चालवण्यात येणार आहेत. तसेच हार्बर मार्गावरील प्रवाशांना सकाळी १० ते सायंकाळी ६ या वेळेत मेन लाईन व पश्चिम रेल्वेमार्गावरून प्रवास करण्याची विशेष परवानगी देण्यात आली आहे. मध्य रेल्वे प्रशासनाने प्रवाशांनी प्रवासाचे नियोजन करूनच घराबाहेर पडावे, असे आवाहन केले आहे. मेगा ब्लॉकमुळे होणारी गैरसोय लक्षात घेता पर्यायी मार्गांचा वापर करण्याचा सल्लाही देण्यात आला आहे.