मुंबईतील कुर्ला परिसरातून एक हृदय पिळवटून टाकणारी घटना समोर आली आहे. येथील नेहरू नगरमधील एका उंच इमारतीत लपाछपी खेळताना 11 वर्षाच्या एका निष्पाप मुलाचा लिफ्टच्या डक्टमध्ये पडून मृत्यू झाला. हा अपघात मंगळवारी कुर्ल्यातील नेहरू नगर परिसरातील शमीम टॉवर या इमारतीच्या दहाव्या मजल्यावर घडला. मृत मुलाची ओळख 11 वर्षीय जमीर शेख अशी झाली आहे.

मिळालेल्या माहितीनुसार, जमीर हा सोसायटीतील इतर मुलांसोबत इमारतीच्या कॉरिडॉरमध्ये लपाछपी खेळत होता. त्याचदरम्यान तो लपण्यासाठी दहाव्या मजल्यावरील लिफ्टच्या दरवाज्याला टेकून उभा राहिला. अचानक लिफ्टचे दार उघडले आणि तो थेट लिफ्टच्या डक्टमध्ये पडला. या घटनेनंतर इमारतीत एकच आरडाओरड सुरू झाली. गंभीर जखमी अवस्थेत जमीरला तात्काळ जवळच्या रुग्णालयात नेण्यात आले, मात्र, उपचार सुरू होण्यापूर्वीच डॉक्टरांनी त्याला मृत घोषित केले. या घटनेनंतर मुलाच्या कुटुंबावर दुःखाचा डोंगर कोसळला आहे.

सीसीटीव्ही फुटेज समोर आले

या हृदयद्रावक अपघाताचे सीसीटीव्ही फुटेजही समोर आले आहे. या व्हिडिओच्या शेवटच्या काही सेकंदांमध्ये खेळता खेळता ही भीषण दुर्घटना कशी घडली, हे स्पष्टपणे दिसून येते. या प्रकरणी नेहरू नगर पोलिसांनी आकस्मिक मृत्यूची नोंद करून पुढील तपास सुरू केला आहे.