मुंबईतील कांदिवली मधून संतापजनक बातमी समोर आली आहे. रिक्षा चालक व स्कूल बस कर्मचाऱ्यांमध्ये एका छोट्या वादानंतर तुफान मारामारी झाली. या घटनेमुळे अर्धा तास वाहतूक विस्कळीत झाली. दरम्यान याप्रकरणी रिक्षाचालक आणि स्कुल बस कर्मचाऱ्याला पोलिसांनी ताब्यात घेतले आहे.

कांदिवलीतील लोखंडवाला रिक्षा स्टँडजवळ बुधवारी सकाळी मुलांना शाळेत घेऊन जाणाऱ्या बसच्या कर्मचाऱ्यासोबत एका रिक्षा चालकाचा शुल्लक कारणावरून जोरदार वाद झाला. या हमरीतुमरीच्या वादाने थेट मारहाणीचे टोक गाठलं.

बराच वेळ ही मारामारी सुरु राहिल्याने स्कुल बस मधील विद्यार्थ्यांना ताटकळत बसमध्ये बसून राहावे लागले. तसेच या घटनेने अर्धा तास रस्त्यावर वाहतूक कोंडी निर्माण झाली. घडलेल्या घटनेची माहिती मिळताच बस मधील विद्यार्थ्यांच्या पालकांनी पोलिसांना कळवले. मात्र पोलिस पोहोचेपर्यंत मुले तब्बल ३० मिनिटे बसमध्ये वाट पाहत होती.

उपस्थित स्थानिकांनी वेळेत हस्तक्षेप करत वाद मिटवण्याचा प्रयत्न केला. मात्र मारामारीत मग्न असलेल्या रिक्षा चालक आणि बस कर्मचाऱ्याचा वाद काही मिटत नव्हता. पोलिसांनी घटनास्थळी पोहोचून परिस्थिती नियंत्रणात आणली. तसेच संबंधितांवर कायदेशीर कारवाई सुरू असल्याची माहिती मिळाली आहे. घडलेल्या घटनेचा पालकांनी तीव्र संताप व्यक्त केला आहे.