Tanushree Dutta Nana Patekar : २०१८ मध्ये काय झालं होतं, तनुश्रीनं नाना पाटेकरांवर काय केले होते आरोप, वाचा सविस्तर

अभिनेत्री तनुश्री दत्ता पुन्हा एकदा चर्चेत आली आहे. 'आशिक बनाया आपने' सारख्या चित्रपटांमधून प्रसिद्धी मिळवणारी ही अभिनेत्री गेल्या काही काळापासून चित्रपटांपासून दूर आहे, पण आता ती पुन्हा चर्चेत आली आहे. यावेळी कारण आहे - तिचा वेदनादायक व्हिडिओ. मंगळवारी तिने इंस्टाग्रामवर एक व्हिडिओ शेअर केला ज्यामध्ये ती खूप रडताना दिसत आहे आणि तिच्या स्वतःच्या घरात तिला छळाचा सामना करावा लागत असल्याचा धक्कादायक आरोप तिने केला आहे. या व्हिडिओसोबत तिने तिच्या कॅप्शनमध्ये २०१८ च्या मी टू चळवळीचाही उल्लेख केला आहे. ही तीच घटना होती जेव्हा तनुश्रीने अभिनेते नाना पाटेकर यांच्यावर लैंगिक छळाचा आरोप केला होता.

नेमकं प्रकरण काय ?

तनुश्री दत्ताने ऑक्टोबर २०१८ मध्ये तक्रार दाखल केली होती. २००८ मध्ये 'हॉर्न ओके प्लीज' या गाण्याच्या शूटिंग दरम्यान नाना पाटेकर यांनी माझा छळ केल्याचे म्हटले होते. नाना पाटेकर यांनी स्पष्टपणे सांगितले होते की ते काहीही अश्लील किंवा त्रासदायक करणार नाहीत, तरीही त्यांनी तिला अयोग्यरित्या स्पर्श केला. असे ही तिने म्हटले. तनुश्री दत्ताने तक्रारीत नाना पाटेकरांसह गणेश आचार्य, अब्दुल सामी सिद्दीकी आणि राकेश सारंग यांचेही नाव घेतले होते. या प्रकरणाची चौकशी केल्यानंतर पोलिसांनी कोणताही गुन्हा सिद्ध झाला नसल्याचे सांगत अहवाल दाखल केला.

यानंतर, तनुश्री दत्ताने डिसेंबर २०१९ मध्ये निषेध याचिका दाखल केली, ज्यामध्ये आरोपींविरुद्ध पुढील चौकशी आणि कारवाईची विनंती केली. त्यावर सुनावणी झाली. नाना पाटेकर यांच्या वतीने वकील अनिकेत निकम यांनी युक्तिवाद केला. मुंबई पोलिसांनी सादर केलेल्या क्लोजर रिपोर्ट आणि पुरेशा पुराव्याअभावी न्यायालयाने अखेर तनुश्रीने दाखल केलेली तक्रार फेटाळून लावली.

व्हायरल व्हिडिओमध्ये काय म्हणाली तनुश्री ?

या व्हायरल व्हिडिओमध्ये तनुश्री दत्ता भावनिक होते आणि म्हणते, "मी खूप अस्वस्थ आहे, गेल्या ५ वर्षांपासून मी हे सर्व सहन करत आहे. माझी तब्येत ठीक नाही, मी काम करू शकत नाही किंवा घर सांभाळू शकत नाही. मी पोलिसांना फोन केला आणि त्यांनी मला पोलिस स्टेशनमध्ये येऊन तक्रार दाखल करण्यास सांगितले."

तिने असेही म्हटले आहे की, "मी मोलकरीण ठेवू शकत नाही, कोणीतरी माझ्या घरी हेरगिरी करत आहे. माझ्याकडे गोपनीयता शिल्लक नाही. कृपया, कोणीतरी मला मदत करा." असे अभिनेत्रीने म्हटले आहे.