संजय गडदे, मुंबई प्रतिनिधी

गोरेगाव येथील सिद्धार्थ नगर सहकारी गृहनिर्माण संस्थेच्या (पत्राचाळ) पुनर्विकास प्रकल्पातील निकृष्ट दर्जाच्या कामाचा पुन्हा एकदा पर्दाफाश झाला आहे. उच्च न्यायालयाच्या १० सप्टेंबर २०२५ च्या आदेशानुसार L विंगचे इंस्पेक्शन सुरू असतानाच,काल F विंगच्या ११व्या मजल्यावरून मोठ्या प्रमाणात प्लास्टर कोसळले. या वेळी काही सभासद त्या भागात तिथे फिरत होते. मात्र सुदैवाने मोठा अनर्थ टळला.

मिळालेल्या माहितीनुसार, याआधीच, १२ ऑक्टोबर रोजी K विंगमध्ये देखील लिफ्टचा मोठा अपघात झाला होता. रहिवासी लिफ्टने इमारतीच्या वरच्या मजल्यावर जात असताना लिफ्ट दुसऱ्या मजल्यावरून थेट खाली जोरात आदळली. त्यावेळी सहा सभासद लिफ्टमध्ये होते. सुदैवाने या अपघातात कोणत्याची प्रकारची जीवितहानी झाली नाही.

वारंवार घडणाऱ्या अशा घटनांमुळे बांधकामाच्या दर्जाच वर आता प्रश्नचिन्ह उपस्थित केली जाऊ लागली आहेत. रहिवाशांनी म्हाडा आणि कंत्राटदारावर निकृष्ट दर्जाचे बांधकाम व भ्रष्टाचाराचे गंभीर आरोप केले आहेत. PMC चा रिपोर्ट आणि वारंवार तक्रारी दिल्यानंतरही कोणतीही कारवाई होत नसल्याचा आरोप रहिवाशांनी केला आहे.

फ्लोअर प्लॅनमध्ये तफावत, दर्जाहीन मटेरिअलचा वापर, वाळवी लागलेले दरवाजे आणि डिझाइननुसार नसलेले किचन प्लॅटफॉर्म या सर्व त्रुटींमुळे रहिवाशांमध्ये तीव्र नाराजी आहे. म्हाडा मात्र कंत्राटदाराला वाचवण्याचा प्रयत्न करत असल्याचा आरोप संस्थेच्या सभासदांनी केला असून, त्यांनी तातडीने उच्चस्तरीय चौकशीची मागणी केली आहे.