संविधानाचे शिल्पकार भारतरत्न डॉ.बाबासाहेब आंबेडकर यांचं स्मृतिदिन देशभरात 'महापरिनिर्वाण दिन' म्हणून पाळला जातो. ६ डिसेंबर १९५६ रोजी त्यांचं निधन झालं. दरवर्षी त्यांच्या स्मृतिदिनानिमित्त देशभरातून लाखो अनुयायी मुंबईतील दादर येथील चैत्यभूमीवर येतात. चैत्यभूमीवर दरवर्षी जनसागर उसळतो. याच पार्श्वभूमीवर दादर परिसरात काटेकोर वाहतूक बंदोबस्त तैनात करण्यात येतो. दरम्यान, पोलिसांनी आतापासूनच बंदोबस्ताची तयारी सुरू केली आहे. महापरिनिर्वाण दिनानिमित्त काही रस्ते बंद ठेवण्यात येणार आहे. तर, काही ठिकाणी वन वे वाहतूक सुरू राहणार असल्याची माहिती समोर आली आहे.

देशभरातून ४ किंवा ५ डिसेंबरलाच दादरला बुद्ध अनुयायी येतात. यामुळे दादरमध्ये २ दिवसांपूर्वीपासूनच कडेकोट बंदोबस्त केली जाते. मुंबई वाहतूक पोलिसांकडून दादर, शिवाजी पार्क तसेच चैत्यभूमी परिसरात ३ दिवसांसाठी वाहतूक व्यवस्था लागू केली जाते. ही विशेष वाहतूक व्यवस्था ५ डिसेंबर ते ७ डिसेंबरच्या मध्यरात्रीपर्यंत लागू असते. या ठिकाणी प्रचंड प्रमाणात बुद्ध अनुयायी येत असल्यामुळे वाहतूकीकडे वाहतूक पोलिसांचे बारकाईने लक्ष असते.

महापरिनिर्वाण दिनानिमित्त तब्बल ४५० पोलीस कर्मचारी तैनात करण्यात आले आहे. मिळालेल्या माहितीनुसार, स्वातंत्र्यवीर सावरकर मार्गावरील सिद्धिविनाय मंदिर जंक्शन ते हिंदुजा रूग्णालय हा रस्ता पूर्णपणे वाहतूकीसाठी बंद राहणार. तर, वाहतूकीसाठी पर्यायी मार्ग म्हणून हिंदुजा रूग्णालय परिसरातील रहिवाशांना एस. बँक जंक्शनकडून डावीकडे वळून पांडूरंग नाईक रोड मार्गे राजा बडे चौकापर्यंत जाण्याची मुभा राहिल.

तसेच एस.के बोले रोडच्या उत्तरेकडील लेनवरून सिद्धिविनायक मंदिर जंक्शन ते पुर्तगाली चर्च जंक्शनदरम्यान एकमार्गी वाहतूक सुरू राहणार असल्याची माहिती आहे. दरम्यान, स्थानिकांनी वाहतूक पोलिसांच्या सूचनांचे काटेकोर पालन करावे, असे आवाहन यावेळी त्यांनी दिले.