'तुम्ही भाजपला विकल्या गेले..' अधिकाऱ्याचा मतदान केंद्रावर सावळा गोंधळ; काँग्रेस नेत्या संतापल्या, नेमकं घडलं काय?

राज्यात २ तारखेला सर्वत्र नगरपंचायत आणि नगरपरिषदेची मतदान प्रक्रिया पार पडली. अनेक प्रभागात सावळा गोंधळ पाहायला मिळाला. अशातच नागपूरच्या गोधनी नगर पंचायतीच्या निवडणुकीतही मोठा गोंधळ झाल्याचे समोर आले आहे. एका मतदान केंद्रावर पुरवणी मतदार यादी अधिकाऱ्यांकडे उपलब्ध नव्हती. यामुळे अनेक मतदारांना मतदान न करता परत जावे लागले. या प्रकारामुळे मतदारांमध्ये प्रचंड नाराजी उसळली. याच मुद्द्यावरून काँग्रेस नेत्या आणि जिल्हा परिषद माजी उपाध्यक्षा कुंदा राऊत यांनी संबंधित अधिकाऱ्यांना चांगलेच फैलावर घेतले. 'तुम्ही भाजपला विकल्या गेले आहे का?', असा थेट सवाल त्यांनी उपस्थित केला.

नेमकं घडलं काय?

२ डिसेंबरला गोधनी नगर पंचायतीसाठी मतदान प्रक्रिया सुरळीतपणे पार पडत होती. मात्र, दुपारनंतर पिटेसूर मतदान केंद्रावर एकच गोंधळ उडाला. मतदारांना त्यांचं नाव मतदार यादीत नाही, असं बोलून पुन्हा परतीच्या मार्गावर पाठवलं. पण मतदारांची नावे पुरवणी यादीत होती. मात्र, केंद्रातील अधिकाऱ्यांकडे नव्हती असं सांगण्यात आलं. यामुळे १५० मतदारांना मतदान नाकारण्यात आले.

या प्रकरणामुळे काही लोकांनी नाराजी व्यक्त केली. काँग्रेस कार्यकर्त्यांनी यावेळी नाराजी व्यक्त करत गोंधळ घातला. यावेळी केंद्रावर एकच गोंधळ निर्माण झाला. या घटनेची माहिती मिळताच काँग्रेस नेत्या कुंदा राऊत तातडीने पिटेसूर मतदान केंद्रावर दाखल झाल्या. त्यांनी अधिकाऱ्यांना मतदारांना मतदानाचा हक्क बजावू द्यावा, अशी विनंती केली. मात्र, अधिकाऱ्यांनी 'यादी मागवलीये' असं सांगत टाळाटाळ केली.

कुंदा राऊत यांना संताप अनावर झाला. 'तुम्ही भाजपला विकल्या गेले आहे का?', असा प्रश्न विचारत त्यांनी अधिकाऱ्याला झापलं. 'तुम्ही भाजपचं काम करीत आहात का? त्यांनी तुम्हाला पैसे दिलेत का? भाजपचं काम करत असाल तर, गळ्यात भाजपचं दुपट्टा घाला', अशा शब्दांत त्यांनी अधिकाऱ्यांना खडसावलं. या घटनेचा व्हिडिओ सध्या समाजमाध्यमांमध्ये व्हायरल होत आहे.