Summary -

• मालाडमध्ये संतापजनक घटना घडली

• डिलिव्हरी बॉयने अल्पवयीन मुलीला अश्लील व्हिडीओ दाखवले

• कुटुंबीयांनी आरोपीला पकडून पोलिसांच्या ताब्यात दिले

• मलाड पोलिसांनी आरोपीविरोधात गुन्हा दाखल करत अटक केली

संजय गडदे, मुंबई

मुंबईतून एक संतापजनक घटना समोर आली आहे. डिलिव्हरी बॉयने अल्पवयीन मुलीला अश्लील व्हिडीओ दाखवले. या प्रकरणी पोलिसांनी आरोपी तरुणाला अटक केली. ही घटना मुंबईतल्या मालाड परिसरात घडली. या घटनेमुळे खळबळ उडाली आहे. पोलिस सध्या आरोपीची चौकशी करत आहेत. आरोपीने आणखी कुठल्या मुलीसोबत असं कृत्य केले का याचा तपास केला जात आहे.

पोलिसांनी दिलेल्या माहितीनुसार, मालाड पोलिस ठाण्याच्या हद्दीत राहणाऱ्या एका महिलेने ऑनलाइन साडीची ऑर्डर दिली होती. डिलिव्हरी बॉय साडी घेऊन दुपारच्या सुमारास त्या महिलेच्या घरी आला. महिलेने त्याला पैसे दिले पण त्याच्याकडे परत देण्यासाठी सुट्टे पैसे नाहीत कुणाला तरी माझ्यासोबत पाठवा मी पैसे देतो असे त्याने सांगितले. डिलिव्हरी बॉयने सुट्टे पैसे घेण्यासाठी बिल्डिंगखाली बोलावले. महिलेने पैसे घेण्यासाठी आपल्या १२ वर्षाच्या मुलीला डिलिव्हरी बॉयसोबत पाठवले.

यावेळी आरोपी डिलिव्हरी बॉयने'पेमेंट डिटेल्स' दाखवण्याच्या बहाण्याने महिलेच्या मुलीला मोबाईलवर अश्लील व्हिडीओ दाखवण्यास सुरूवात केली. आरोपीचे हे कृत्य पाहून मुलगी प्रचंड घाबरली. जेव्हा ती मुलगी ओरडायला लागली त्यानंतर आरोपी फरार झाला. घरी आल्यानंतर मुलीने तिच्यासोबत घडलेला प्रकार आईला सांगितला. महिलेने आपल्या मुलाला आणि नवऱ्याला या घटनेची माहिती दिली.

त्यांनी तात्काळ बायकोने ज्या दुकानातून साडी ऑर्डर केली होती तिथे धाव घेतली. त्यांनी आरोपी डिलिव्हरी बॉयला पकडलं आणि मालाड पोलिसांच्या ताब्यात दिले. घटनेचे गांभीर्य लक्षात घेऊन मालाड पोलिसांनी आरोपीविरोधात गुन्हा दाखल करत त्याला अटक केली. अटक करण्यात आलेल्या आरोपीचे नाव मोहम्मद उपेश अनवर अंसारी असून तो मालाडच्या मालवणी परिसरातील रहिवासी आहे.