- अभिजीत देशमुख

पावसाळा अवघ्या काही दिवसांवर येऊन ठेपला असताना कल्याण डोंबिवलीतील नाल्यातील गाळ तसाच असल्याचे दिसून येतेय. आज (शुक्रवार) आमदार विश्वनाथ भोईर यांनी पालिका अधिकाऱ्यांसोबत नालेसफाईच्या कामांची पाहणी केल्यानंतर कामाबाबत नाराजी व्यक्त केली. आमदार भाेईर यांनी नालेसफाईसाठी पाच दिवसांचा अल्टीमेटम देत काम याेग्य न झाल्यास केडीएमसी अधिकारी आणि कंत्राटदारांची गय केली जाणार नाही असा इशारा दिला.

आमदार विश्वनाथ भोईर यांना आज नाल्यांमध्ये कचरा, साचलेला कचरा आढळून आल्याने ते संतप्त झाले. आमदार भोईर यांनी केडीएमसी अधिकाऱ्यांना चांगलेच धारेवर धरले. नालेसफाईसाठी केडीएमसीकडून दरवर्षी कोट्यवधी रुपये खर्च केले जातात. मात्र हा सर्व पैसा जनतेच्या खिशातून आलेला असून त्याची उधळपट्टी आपण होऊ देणार नाही अशा शब्दांत आमदार भोईर यांनी केडीएमसी अधिकाऱ्यांना सुनावले.

तसेच यावेळी केडीएमसी अभियंता घनश्याम नवांगुळ यांनी नालेसफाई केली असल्याचे आमदार भोईर यांना सांगितले. मात्र नालेसफाई झाली असे तुम्ही सांगता मग नाल्यात हा कचरा आणि गाळ कसा काय आहे? असा सवाल भाेईर यांनी केला.

लोकांना आम्हाला उत्तरे द्यावी लागतात असे सांगत पुढील 5 दिवसांत कल्याण पश्चिमेतील सर्व प्रमुख नाल्यांची सफाई योग्य तऱ्हेने झाली पाहिजे. आपण पाच दिवसांनी पुन्हा पाहणी करू आणि आपल्याला कुठे नाले सफाई झाली नसल्याचे आढळल्यास संबंधित अधिकारी आणि कंत्राटदाराची आपण कोणतीही गय करणार नाही असा सज्जड दम आमदार विश्वनाथ भोईर यांनी केडीएमसी अधिकाऱ्यांना दिला.

Byte :- विश्वनाथ भोईर ( आमदार कल्याण पश्चिम)