सचिन गाड

Bachchu Kadu News: प्रहार संघटनेचे आमदार बच्चू कडू यांना मुंबई उच्च न्यायालयाचा दिलासा मिळाला आहे. नाशिकमध्ये सरकारी कामात अडथळा आणि आणि अधिकाऱ्यासोबत गैरवर्तणूक केल्याप्रकरणी न्यायालयाने ५ हजारांचा दंड आणि एक वर्षाची शिक्षा ठोठावली होती. नाशिकमधील याच प्रकरणात कोर्टाने दिलासा देत १ वर्षाच्या शिक्षेला स्थगिती दिली आहे. (Latest Marathi News)

2017 साली दिव्यांगांच्या मागण्यांसाठी बच्चू कडू यांनी महापालिकेत आंदोलन केलं होते. यावेळी बच्चू कडू (Bachchu Kadu) तत्कालीन महापालिका आयुक्त अभिषेक कृष्णा यांच्या अंगावर धावून गेले होते. तसेच शिवीगाळ केली होती. या प्रकरणी बच्चू कडू यांना नाशिक जिल्हा सत्र न्यायालयाने दोन वर्षांची शिक्षा सुनावली होती.

नाशिकच्या याच प्रकरणात बच्चू कडू यांना मोठा दिलासा मिळाला आहे. बच्चू कडू यांना मुंबई उच्च न्यायालयाने जामीन मंजूर केला आहे. तसेच नाशिकमध्ये दाखल गुन्ह्यातील शिक्षेला स्थगिती देखील मिळाली आहे.

नेमकं प्रकरण काय?

2017 साली नाशिक महापालिकेवर प्रहार संघटनेच्या नेतृत्वाखाली आंदोलन करण्यात आलं होतं. यावेळी बच्चू कडू यांनी तत्कालीन महापालिका आयुक्त अभिषेक कृष्णा यांची भेट घेतली होती. या भेटीदरम्यान त्यांच्यात शाब्दिक वाद झाला. यावेळी बच्चू कडू यांचा संयम सुटला.

त्यानंतर कडू हे थेट आयुक्त अभिषेक कृष्णा यांच्या अंगावर धावून गेले. त्यांनी आयुक्तांना शिवीगाळ करत त्यांच्यावर हात उगारल्याचा दावा केला जातो. यावेळी पोलीस कर्मचाऱ्यांनी आयुक्त अभिषेक कृष्णा यांना संरक्षण देत आमदार बच्चू कडू यांना बाजूला केले होते.

तसेच सरकारी कामात अडथळा आणल्याप्रकरणी त्यांच्यावर 353 अंतर्गत गुन्हा दाखल करण्यात आला होता. त्यानंतर बच्चू कडू यांना दोन वर्षांचा कारावास ठोठावण्यात आला होता.