संजय गडदे, मुंबई

म्हाडा मुंबई मंडळाने 2030 घरांसाठी लॉटरी काढली आहे. या घरांच्या सोडतीसाठी अर्ज करण्याची मुदत संपली आहे. घरासाठी अर्ज करण्याची मुदत संपेपर्यंत सोडतीसाठी 1,34344 अर्ज प्राप्त झाले आहेत. तर 113568 अर्जदारांनी अनामत रक्कम जमा केली आहे. 19 सप्टेंबरला रात्री 11.59 वाजेपर्यंत ऑनलाइन अनामत रकमेचा भरणा करण्यास परवानगी होती.

सोडतीसाठी अर्ज भरणा प्रक्रियेला 9 ऑगस्ट रोजी दुपारी 12 वाजल्यापासून सुरूवात झाली होती. गेल्यावर्षी 4082 घरांसाठी प्राप्त 145000 अर्जांपैकी 119278 अर्जदारांनी अनामत रक्कम भरली होती. गेल्या वर्षीच्या तुलनेत यंदा घरे कमी असतानाही नागरिकांचा जोरदार प्रतिसाद मिळाला. 8 ऑक्टोबर 2025 रोजी सकाळी 11 वाजता मुंबईतील नरीमन पॉइंट येथील यशवंतराव चव्हाण सेंटर येथे संगणकीय सोडत काढली जाणार आहे.

27 सप्टेंबर रोजी सायंकाळी सहा वाजता सोडतीसाठी प्राप्त झालेल्या अर्जांची प्रारूप यादी म्हाडाच्या वेबसाइटवर प्रसिद्ध केली जाणार आहे. यादी प्रसिद्ध झाल्यापासून ऑनलाईन दहावी हरकती दाखल करण्यासाठी 29 सप्टेंबर दुपारी 12 वाजेपर्यंत मुदत देण्यात आली आहे. सोडतीसाठी अंतिम यादी 3 ऑक्टोबर रोजी म्हाडाच्या वेबसाइटवर प्रसिद्ध केली जाणार आहे.