मुंबईतच मायबोली मराठी संकटात सापडलीय. होय आजवर अनेकांनी मराठीचा अपमान केल्याचं आपण पाहिलंय. मात्र भिंवडीत थेट राष्ट्रीय स्वयंसेवक संघाचे सरकार्यवाह भैय्याजी जोशींनी केलेल्या वक्तव्यानं अनेकांचा संताप झालाय.

मुंबईतील घाटकोपरची भाषा गुजराती असल्याचं म्हणत भैय्याजी जोशींनी मराठी मनाच्या जखमेवर मीठ चोळल्याचाच हा प्रकार म्हणावा लागेल. कारण याच घाटकोपरमध्ये मराठी माणसाला गुजरातींनी घर नाकारल्याची घटना वर्षभरापुर्वी घडली होती तर याच घाटकोपरमध्ये गुजरातीत दुकानाच्या पाट्या लावल्यानं मराठी आणि गुजराती वादाची ठिणगी पडली होती आणि आता भैय्याजींनी केलेल्या या वक्तव्यानं थंड झालेल्या या वादात तेल ओतण्यात आलं आणि त्याचा भडका उडालाय...या वक्तव्यानंतर राज ठाकरेंनी थेट भैय्याजींना इशारा दिलाय..

भय्याजींवर राज ठाकरे संतापले

मराठी माणूस हे वक्तव्य विसरणार नाही जोशीबुवांनी लक्षात ठेवावं

राजकीय हेतू असल्याशिवाय हे वक्तव्य होणे नाही

काड्या घालून नवा संघर्ष उदयाला आणत आहात

MMRमधील विकास, त्यामागील राजकीय हेतू न समजण्याइतकी मराठी जनता दुधखुळी नाही

भाजप राज्याच्या अस्मितेला प्राधान्य देत निषेध नोंदवणार?

एवढंच नाही तर राज ठाकरेंपाठोपाठ उद्धव ठाकरेंनीही भय्याजी जोशींचा अनाजीपंत असा उल्लेख केलाय...

संघाचे सरकार्यवाह भैय्याजीं जोशींवर आता चौफर टिकेची झोड उठल्यानं आणि विरोधकांनी थेट राजद्रोहाचा गुन्हा दाखल करण्याची मागणी केल्यानंतर भय्याजी जोशींनी सारवासारव केली.

राजकीय वातावरण तापल्यानंतर भय्याजींनी आपल्याच वक्तव्यावरुन घुमजाव केलं. मुंबईत मराठीवर घाव घालणारे अनेक परप्रांतिय आपण आजवर पाहिलेत. ज्यांनी मराठीला नाकारत मराठी बोलायला नकार दिला किंवा मुंबईत मराठी ऐवजी गुजराती आणि हिंदीचा आग्रह करत मराठीचा अपमान केला.

अभिजात भाषेचा दर्जा मिळूनही मराठीचा हा अपमान थांबणार तरी कधी की कायम राजकीय पोळ्या भाजण्यासाठी आमच्या मराठीला अशा अवमानाला सामोरं जावं लागणार असा संतप्त सवाल मराठी जनांनी केलाय.