गणेशोत्सव अगदी काही दिवसांवर आला असून अनेक दिवसांपासून दडी मारलेला पाऊस गणरायाच्या स्वागतला पुन्हा येण्याची शक्यता वर्तवण्यात आली आहे. अनेक भागांत काही दिवसांपासून तपमानाचा पारा वाढलेला असल्याने उकाड्यात काहीशी वाढ पाहायला मिळाली. तापमानात वाढ झाल्याने नागरिकांना उन्हाचा चटका आणि उकाड्याचा सामना करावा लागला. मात्र, आता राज्यात पुन्हा पावसासाठी पोषक हवामान तयार होत असल्याची माहिती हवामान विभागाने दिली आहे.

हवामान विभागाच्या ताज्या अंदाजानुसार, उत्तर महाराष्ट्र आणि मराठवाड्यातील काही भागांत स्थानिक वातावरणाच्या प्रभावामुळे विजांच्या कडकडाटासह पावसाची शक्यता आहे. विशेषतः नंदूरबार, नाशिकचा घाटमाथा आणि नांदेड जिल्ह्यात तुरळक ठिकाणी पावसाच्या सरी कोसळू शकतात.

दरम्यान, राज्यातील उर्वरित भागांत ढगाळ वातावरण राहण्याची शक्यता आहे. काही ठिकाणी ऊन तर काही वेळ ढगांची दाटी, असा हवामानाचा खेळ सुरू राहणार आहे. यामुळे पावसाची शक्यता पूर्णपणे संपलेली नसून, तुरळक ठिकाणी हलक्या सरी पडू शकतात. मात्र, अनेक भागांत सध्या पावसाऐवजी उघडीपच अधिक राहण्याचा अंदाज आहे.

उद्यापासून पावसाचा जोर वाढण्याची शक्यता

राज्यातील पावसाच्या दृष्टीने ११ सप्टेंबरपासून परिस्थितीत बदल होण्याची शक्यता आहे. हवामान विभागाच्या अंदाजानुसार, विदर्भ, मराठवाडा आणि मध्य महाराष्ट्रातील काही भागांत पावसाला सुरुवात होऊ शकते. त्यामुळे सध्या जाणवत असलेला उकाडा काही प्रमाणात कमी होण्याची शक्यता आहे. गेल्या काही दिवसांत पावसाने घेतलेल्या विश्रांतीमुळे तापमानात वाढ झाली आहे. परिणामी सकाळपासूनच वातावरण उष्ण जाणवत असून दुपारच्या वेळी उन्हाचा चटका अधिक तीव्र होत आहे. आता पावसासाठी पोषक स्थिती निर्माण होत असल्याने पुढील काही दिवसांत राज्यातील हवामानात पुन्हा चढ-उतार पाहायला मिळण्याची शक्यता आहे.