शिवसेनेचे नेते तसेच प्रतोद भरत गोगावले यांची नियुक्ती एसटी महामंडळाच्या अध्यक्षपदी केली जाणार असल्याची माहिती समोर आली आहे. ऐन विधानसभा निवडणुकीच्या तोंडावर नियुक्ती केल्यामुळे भरत गोगावले पदभार स्वीकारतील का याकडे सर्वांचे लक्ष लागले आहे. दोनच दिवसांपूर्वी शिवसेनेतील आनंदराव अडसूळ, हेमंत पाटील, संजय शिरसाट यांना महामंडळ मिळाल्यामुळे राजकारण तापल होतं.

आता शिवसेनेच्या आणखीन एका आमदाराची नियुक्ती महामंडळावर केल्यामुळे राष्ट्रवादी काँग्रेस अजित पवार गट नाराज असल्याची चर्चा होत आहे. सत्तेत केवळ एकाच पक्षाच्या पदाधिकाऱ्यांना महामंडळ तसेच मंत्रीपदाचे वाटप होत असल्यामुळे अजित पवार गट नाराज असल्याचे बोलले जात आहे.

भरत गोगावले यांनी साम टीव्हीला प्रतिक्रिया देताना सांगितले की, 'मुख्यमंत्र्यांच्या निर्णयाचे मी स्वागत करतो. हे पद दिले त्याला खूपच उशीर झाला आहे. निवडणुका तोंडावर आल्या आहेत. आचारसंहितेला १५ ते २० दिवसांचा कालावधी बाकी आहे. मुख्यमंत्र्यांशी आम्ही चर्चा करू. या चर्चेनंतरच पदभार स्वीकारायचा की नाही हे ठरवू.', असे सांगितले. त्यामुळे आता भरत गोगावले हे पद स्वीकारतात की नाही याकडे सर्वांचे लक्ष असणार आहे.

भरत गोगावले यांची एसटी महामंडळाच्या अध्यक्षपदी नियुक्ती केली जाणार आहे. आज दुपारपर्यंत त्यांच्या नियुक्तीचे आदेश निघण्याची शक्यता आहे. दरम्यान, भरत गोगावले यांना पहिल्या कॅबिनेट विस्तारात मंत्रिपद मिळेल अशी चर्चा होती. पण त्यांना मंत्रिपद मिळाले नाही त्यामुळे ते नाराज होते. ते मंत्रिपदाची वाट पाहत होते. पण आता त्यांची थेट एसटी महामंडळाच्या अध्यक्षपदी नियुक्ती करण्यात आली आहे. आता ते पद स्वीकारणार की नाही हे लवकरच कळेल.