शिधावाटप विभागाच्या धडक कारवाईत

वरळीत गॅस सिलिंडरचा काळाबाजार उघड

मोठा साठा जप्त

मुंबईतील वरळीत मोठी कारवाई करण्यात आली आहे. वरळी परिसरात घरगुती आणि व्यावसायिक गॅस सिलिंडरचा काळाबाजार करणाऱ्या टोळीवर शिधावाटप विभागाने धडक कारवाई केली. या कारवाई पथकाने मोठा साठा जप्त केलाय. रहिवासी राहत असलेल्या भागात धोकादायक पद्धतीने सिलिंडरची साठेबाजी केली जात होती. त्यानंतर हे सिलिंडरची काळ्यात बाजारात विक्री केली जात होती.

शिधावाटप विभागाचे फिरते पथक आणि कार्यालय क्रमांक २१ च्या अधिकाऱ्यांनी संयुक्तपणे कारवाई केली. वरळीतील नाका येथील गणपतराव कदम मार्गावरील ‘सूरज वल्लभदास चाळ’ परिसरात गॅस सिलिंडरची अवैध साठेबाजी सुरू होती. या साठेबाजीद्वारे चढ्या दराने विक्री केली जात होती. याची माहिती प्रशासनाला मिळाली होती. त्यानुसार पथकाने तातडीने छापा टाकला. त्यानंतर अवैधरित्या साठवलेले सिलिंडर जप्त केले.

कारवाईत काय आढळलं?

कारवाईत एचपी गॅस कंपनीचे पाच किलोचे सहा भरलेले आणि ५८ रिकामे सिलिंडर जप्त करण्यात आले. त्याचबरोबर सुपर गॅस कंपनीचे चार किलोचे ६४ भरलेले सिलिंडर आढळले. त्याचबरोबर १२ किलोचे १९ भरलेले सिलिंडर जप्त करण्यात आले. याशिवाय १२, चार आणि दोन किलोचे विविध आकाराचे २५ रिकामे सिलिंडर घटनास्थळी सापडले.

सिलिंडर बेकायदेशीररित्या रिफिलिंग करून काळ्या बाजारात विकण्यात येत होते, अशी माहिती अधिकाऱ्यांनी दिली. जप्त करण्यात आलेला सर्व मुद्देमाल वरळी पोलिसांच्या स्वाधीन केला आहे. रहिवासी भागात अशा प्रकारे सिलिंडर साठवणे आणि त्यांची बेकायदेशीर विक्री करणे अत्यंत धोकादायक बाब मानली जाते. त्यामुळे नागरिकांच्या जीवितास मोठा धोका निर्माण होऊ शकतो, असे प्रशासनाने स्पष्ट केले.

नियंत्रक शिधावाटप चंद्रकांत डांगे यांच्या मार्गदर्शनाखाली ही कारवाई करण्यात आली. गॅस सिलिंडरचा काळाबाजार करणाऱ्यांविरोधात कठोर कारवाई करण्यात येणार आहे. अशा प्रकारांना आळा घालण्यासाठी विभागाची पथके २४ तास सतर्क असल्याचा इशाराही प्रशासनाने दिलाय.