मयूर राणे , साम प्रतिनिधी

इमारतीच्या १३ व्या मजल्यावरून उडी मारून आत्महत्या करणाऱ्या एका कामगाराचा व्हिडिओ खूप व्हायरल होत आहे. मानसिक तणावात असलेल्या ने हा कामगार आत्महत्या करत असल्याची माहिती समोर आलीय. हा व्हिडिओ विक्रोळीतील कन्नमवार येथील आहे. विशेष म्हणजे १३ व्या मजल्यावरून उडी मारुनही हा कामगार सुखरूप आहे. विशेष म्हणजे या कामगाराने एक नाही तर आत्महत्येचे दोनदा प्रयत्न केले. परंतु दोन्ही वेळेस त्याला कोणतीच इजा झाली नाही. या घटनेमुळे देव तारी त्याला कोण मारी, या म्हणीची प्रचिती झालीय.

विक्रोळीच्या कन्नमवार नगर भागात निर्माणाधीन असलेल्या ५७ क्रमांकाच्या इमारतीवरून उडी मारून एक कामगार आत्महत्या करण्याचा प्रयत्न करत होता. हा कामगार १३ व्या मजल्यावरून उडी मारून संपवण्याच्या विचारात होता. परंतु देवाला त्याला तारायचं होतं. त्यामुळे दोनवेळा इमारतीवरून उडी मारूनही हा कामगार सुखरुप आहे. या कामगाराने आधी १३ व्या मजल्यावरून त्याने उडी मारली पण सुरक्षेसाठी लावण्यात आलेल्या जाळ्यांमध्ये अडकला. त्यामुळे तो सुरक्षित राहिला.

बिरजूप्रसाद रमेश बनरवा, असे या कामगाराचे नाव आहे. आत्महत्या करण्याच्या प्रयत्नातून बचावल्यानंतर त्याला त्याच्या उत्तरप्रदेशमधील गोरखपूर गावी पाठविण्यात आले आहे. तो काही दिवसांपासून मानसिक तणावात होता. काल तो काम करीत असलेल्या ५७ क्रमांकाच्या इमारतीच्या तेराव्या मजल्यावर गेला तिथून त्याने खाली उडी मारली. परंतु तो आठव्या मजल्यावर लावण्यात आलेल्या जाळीत अडकला. तिथून ही त्याने उडी मारली तर तिसऱ्या मजल्यावरील जाळीत अडकला. तिथून उडी मारल्यावर खाली लोकांनी पकडलेल्या जाळीत पडला आणि वाचला.