चंद्रपूर जिल्ह्यातील नागभीड तालुक्यातील मिन्थूर येथील रोशन कुडे या तरुण शेतकऱ्याची हृदयद्रावक कहाणी महाराष्ट्र समोर आली आहे. सावकारी कर्जाच्या विळख्यात अडकल्यामुळे आणि कर्जाची परतफेड करण्यासाठी दुसरा कोणताही मार्ग न उरल्याने, या शेतकऱ्याने थेट कंबोडिया गाठून किडनी विकली.

कंबोडिया येथून या शेतकऱ्यांना व्हिएनतियान या देशात नेण्यात आले. तिथे एका कॉल सेंटरमध्ये नोकरीसाठी पाठवण्यात आले. तिथे दिवसाचे अठरा तास त्याचे काम होते. काम केले नाही तर मारहाण केली जायची. पगार ही दिला जायचा नाही. या शेतकऱ्याच्या कुटुंबियांनी काँग्रेस विधिमंडळ नेते विजय वडेट्टीवर यांची भेट घेतली. त्यानंतर वडेट्टीवार यांनी पोलिस आणि त्या देशातील भारताच्या दूतावासाशी संपर्क केला.

रोशन कुडे याने सावकाराकडून एक लाखाचे कर्ज घेतले. पण व्याज लागून ते कर्ज 50 लाखपर्यंत पोहोचले. किडनी एक कोटीत विकली गेली, तरी ज्याची किडनी आहे. त्याला फक्त पाच ते सात लाख देण्यात आले होते. या सर्व जाचाला वैतागून रोशल कुडे आत्महत्या करण्याच्या मानसिकतेत पोहोचला होता. पण काँग्रेसने त्याला आधार दिला.

सावकार आणि किडनी विकणाऱ्यांचे एक रॅकेट असून याविरोधात कारवाई करण्यासाठी काँग्रेस विधिमंडळ नेते विजय वडेट्टीवार यांनी पाठपुरावा केला. या प्रकरणी समिती नेमून चौकशीची मागणी देखील केली. राज्यातील शेतकरी उध्वस्त होत आहे. सावकार आणि बँकांच्या कर्जाच्या विळख्यात तो अडकला आहे. एका शेतकऱ्याला वाचवण्यात यश आले पण असे अनेक शेतकरी आजही संघर्ष करत आहेत. रोशन कुडे या शेतकऱ्याने आज आपली कहाणी माध्यमांसमोर मांडली.