संघर्ष गांगुर्डे,साम टीव्ही

कल्याण: लग्नाचे आमिष दाखवून महिलांची फसवणूक झाल्याची घटना अनेकदा समोर आल्या आहेत. पण आता दोन महिलांनी लग्नाचे आमिष दाखवून एका व्यवसायाची फसवणूक केल्याची घटना कल्याणमध्ये घडली आहे. लग्नाचे आमिष दाखवून व्यावसायिकाची तब्बल ३५ लाखांची फसवणूक केल्याप्रकरणी दोघींना अटक करण्यात आली आहे.

पोलिसांनी दिलेल्या माहितीनुसार, कल्याण पश्चिमेतील एका नामांकित दुकानाच्या मालकाची ओळख जयश्री पाटील हिने मुंबईत राहणाऱ्या रोमा परदेशी हिच्याशी करून दिली होती. रोमा एका मोठ्या इन्शुरन्स कंपनीत काम करत असल्याचे सांगत तिने व्यावसायिकाशी जवळीक वाढवली. सुरुवातीला इन्शुरन्स पॉलिसीच्या माध्यमातून ओळख निर्माण करण्यात आली आणि त्यानंतर विश्वास संपादन करण्यात आला.

रोमा परदेशी हिने इन्शुरन्सच्या नावाखाली व्यवसायिकाकडून लाखो रुपये घेतले मात्र इन्शुरन्स पॉलिसी उघडण्यात आली नाही. काही दिवसानंतर रोमा हिने जयश्री पाटील मार्फत संबंधित व्यावसायिकासोबत लग्न करण्याची तयारी दर्शवली. लग्नासाठी होकार दिल्यानंतर दोन्ही महिलांनी वेळोवेळी विविध कारणे सांगत संबंधित व्यावसायिकाकडून पैसे घेतले. तक्रारदाराच्या म्हणण्यानुसार, आतापर्यंत सुमारे ३५ लाख रुपये त्यांनी या दोघींना दिले होते. फसवणुकीची बाब लक्षात आल्यानंतर व्यावसायिकाने महात्मा फुले पोलीस ठाणे येथे तक्रार दाखल केली.

या प्रकरणात पोलिसांनी काही दिवसांपूर्वी रोमा परदेशी हिला अटक केली होती. तपासादरम्यान पोलिसांनी तिची मैत्रीण जयश्री पाटील हिला कोल्हापूरमधून अटक केली असून तिला पुढील कारवाईसाठी कल्याणमध्ये आणण्यात येत आहे. तक्रारदार व्यावसायिकाने पोलिसांकडे आपले पैसे परत मिळवून देण्याची मागणी केली आहे. लग्नाचे आमिष दाखवून माझ्यासोबत फसवणूक करण्यात आली. आरोपींकडून रक्कम वसूल करून मला न्याय मिळावा,अशी भावना त्यांनी व्यक्त केली. या प्रकरणाच्या तपासता महात्मा फुले पोलीस करीत आहेत