अभिजीत देशमुख, कल्याण|ता. २५ जानेवारी २०२४

Kalyan Breaking News:

शाळा व महाविद्यालय परिसरात तंबाखूजन्य पदार्थ विक्रीवर बंदी असतानाही सर्रास विक्री सुरू असल्याचे चित्र कल्याण डोंबिवली परिसरात दिसून येत आहे. यावर कल्याण पालिका प्रशासनाने आक्रमक भूमिका घेतली आहे. कल्याण डोंबिवली महापालिका क प्रभाग व कल्याण बाजारपेठ पोलीस ठाणे यांनी संयुक्त कारवाई करत शाळा महाविद्यालय परिसरात असलेल्या पानाच्या टपऱ्या जेसीबीनेच्या साहाय्याने जमीनदोस्त केल्या.

महाराष्ट्र शासन व सर्वोच्च न्यायालयाच्या निर्देशानुसार शाळा व महाविद्यालयाच्या 100 मीटरच्या परिघात, विडी, तंबाखू, गुटखा यासह तंबाखूजन्य पदार्थ विक्रीवर बंदी आहे. असे असताना शहरातील अनेक शाळा, महाविद्यालय परिसरात सर्रास तंबाखूजन्य पदार्थांची विक्री होत असल्याचे दिसून येत आहे.

या पार्श्वभूमीवर कल्याण (Kalyan) डोंबिवली महापालिका क प्रभागाचे सहाय्यक आयुक्त तुषार सोनवणे व कल्याण बाजारपेठ पोलीस ठाण्याचे वरिष्ठ पोलीस निरीक्षक अशोक कडलग यांच्या पथकाने गोविंदवाडी, दुर्गाडी ,मोहिंदर काबुल सिंग,वल्लीपिर रोड शाळांच्या परिसरात असलेले पान टपर्यावर धडक कारवाई करत जेसीबीने या टपऱ्या जमीनदोस्त केल्या.

धडक कारवाईचे नागरिकांकडून स्वागत...

दरम्यान, या धडक कारवाईने शाळा, महाविद्यालय परिसरातील पानटपऱ्या आणि तंबाखूजन्य पदार्थ विक्रेत्यांमध्ये एकच खळबळ उडाली आहे. नागरिकांनी पोलीस आणि महापालिकाच्या या धडक कारवाईचे स्वागत केले आहे. (Latest Marathi News)

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)