Summary -

• कल्याण मोहने परिसरातील राडा प्रकरणाला राजकीय वळण

• शिंदेसेनेच्या दोन पदाधिकाऱ्यांना बेदम मारहाण करण्यात आली

• मनसे कार्यकर्त्यांवर गंभीर आरोप करण्यात आले

• पोलिसांकडून सध्या तपास सुरू आहे

संघर्ष गांगुर्डे, कल्याण

कल्याणमधील मोहने परिसरातील राडा प्रकरणाला राजकीय वळण आले आहे. शिवसेना शिंदे गटाच्या दोन पदाधिकाऱ्यांना बेदम मारहाण करण्यात आली. दोन दिवसांपूर्वी मोहने येथे राडा झाला होता. त्यानंतर शिवसेना शिंदे गटाच्या दोन पदाधिकाऱ्यांवर मनसे पदाधिकारी राहुल कोट आणि अमित कोट यांनी बेदम मारहाण केल्याचा गंभीर आरोप करण्यात आला आहे. या घटनेमुळे कल्याणमधील राजकीय वातावरण तापले आहे.

मिळालेल्या माहितीनुसार, दुसऱ्या गटातील एका तरुणासोबत घेतलेल्या फोटोचा मुद्दा काढून दोघांमध्ये वाद झाला. या वादाचे रूपांतर मारहाणीत झाले. यात शिंदे गटाच्या दोन्ही पदाधिकाऱ्यांना गंभीर दुखापत झाली असून त्यांच्यावर सध्या रुग्णालयात उपचार सुरू आहेत. या घटनेनंतर परिसरात तणावाचे वातावरण निर्माण झाले असून खडकपाडा पोलिस ठाण्यात गुन्हा दाखल करण्याची प्रक्रिया सुरू आहे. पोलिस या घटनेचा तपास करत आहेत.

कल्याण मोहने परिसरात तीन दिवसांपूर्वी दगडफेक आणि तोडफोडीच्या प्रकरण झाले होते. या घटनेत पोलिसांनी २५ ते ३० जणांविरोधात हत्येच्या प्रयत्नासह गंभीर गुन्हे दाखल केले आहेत. या यादीत २ वर्षांच्या चिमुरडीचं नाव असल्याचं धक्कादायक प्रकार समोर आला आहे. या गोष्टीमुळे चिमुकलीच्या कुटुंबियांमध्ये संतापाचं वातावरण निर्माण झालं असून पोलिसांच्या निष्काळजी कारभारावर नागरिकांनी तीव्र नाराजी व्यक्त केली आहे.

तीन दिवसांपूर्वी मोहने परिसरात फटाक्यांच्या वादातून दोन गटांत दगडफेक आणि तोडफोड झाली होती. घटनेचा व्हिडिओ सोशल मीडियावर व्हायरल झाला होता. या घटनेनंतर खडकपाडा पोलिसांनी दोन्ही गटांवर गुन्हे दाखल केले. गुन्ह्याच्या यादीत एका दोन वर्षांच्या मुलीचे नाव असल्यामुळे या घटनेची सध्या चर्चा होत आहे. याबाबत पोलिसांच्या कामकाजावर प्रश्नचिन्ह उपस्थित केले जात आहे.