रोहिदास गाडगे, साम टीव्ही पुणे

पुणे जिल्ह्यातील पहिलं धरण ओव्हरफ्लो झाल्याचं समोर आलंय. खेड आणि शिरुर तालुक्यासाठी वरदान ठरत आहे. कारण यंदा कळमोडी धरणाला पुणे जिल्ह्यात सर्वात पहिलं भरल्याचा मान मिळालाय. मागील काही दिवसापासून संततधार पाऊस सुरू आहे. त्यामुळे हे धरण पूर्ण भरलं असल्याची माहिती मिळतेय.

पुणेकरांसाठी खुशखबर

सह्याद्रीच्या कुशीत भिमाशंकर परिसरात गेल्या आठ दिवसांपासुन पाऊसाची संततधार सुरु आहे. त्यामुळे आरळा नदीवर असणारे कळमोडी धरण पुर्ण क्षमतेने भरले (Kalamodi Dam Overflow) आहे. या धरणातुन आरळा नदीतुन चास-कमान धरणात ५०० क्युसेसने पाण्याचा विसर्ग सुरु करण्यात आलाय. भिमाशंकरच्या परिसरात पाऊसाची संततधार अशीच सुरु राहिल्यास चास-कमान धरणाची पाणी पातळीही झपाट्याने वाढणार आहे. त्यामुळे प्रशासनाकडुन नदीकाठच्या गावांना सतर्कतेचा इशारा देण्यात (Rain Update) आलाय.

पुणे जिल्ह्यातील पहिलं धरण ओव्हरफ्लो

कळमोडी धरण खेड तालुक्यातील पश्चिम भागात (Pune News) आहे. या धरणाची साठवण क्षमता १.५ टीएमसी आहे. कळमोडी धरण पूर्ण क्षमतेने भरल्याचं समोर आलंय. या धरणामधून आरळा नदीत पाण्याचा विसर्ग सुरु करण्यात आलाय. नदीकाठच्या गावांना आणि नागरिकांना पूराचा धोका आहे. त्यामुळे प्रशासनाकडून त्यांना सतर्कतेचा इशारा देखील देण्यात आल्याची माहिती मिळतेय. हे धरण भरल्यामुळे पुणेकरांवरील पाणीसंकट काहीसं दुरावलं आहे. त्यामुळे पुणेकरांसाठी ही दिलासादायक बातमी आहे.

कळमोडी धरण पूर्ण क्षमतेनं भरलं

पुणे जिल्ह्यामध्ये मागील काही दिवसांपासून घाटमाध्यावर पावसाने दमदार हजेरी लावल्याचं वृत्त आहे. त्यामुळे खेड तालुक्यातील कळमोडी धरणाच्या पाणलोट क्षेत्रातील खरपूड, भोमाळे, परसूल, घोटवडी परिसरात देखील मुसळधार पाऊस (Pune District Water Storage) पडलाय. या पावसामुळे धरण भरण्यात मोठी मदत झालेली आहे. पाणीसाठ्यामध्ये झपाट्याने वाढ झाल्यामुळे कळमोडी धरण ‘ओव्हरफ्लो’ झालंय. यामुळे आता चासकमान धरणातील पाणीसाठ्यात देखील वेगाने वाढ होणार आहे.