सचिन जाधव, साम टीव्ही

पुणे: अनैतिक संबंधामुळे इमारतीतील रहिवाशांना त्रास होत असल्याच्या कारणावरून महिलेसमोरच मारहाण केल्याच्या रागातून गणेश मंडळाच्या माजी अध्यक्षाचा खून केल्याप्रकरणी न्यायालयाने दोघांना जन्मठेपेची शिक्षा सुनावली आहे. संजय अनंत मोहोळ (वय ३९, रा. दत्तवाडी) आणि संभाजी सदाशिव कांबळे (वय २७, रा. कोथरूड) अशी शिक्षा सुनावण्यात आलेल्यांची नावे आहेत. त्यांना जन्मठेपेसह २७ हजारांचा दंडही ठोठावला असून दंड न भरल्यास अतिरिक्त दोन महिन्यांचा कारावास भोगावा लागेल असे निकालात नमूद केले आहे.

सागर शिंदे (वय ३१, रा. कर्वे रोड) असे खून झालेल्याचे नाव आहे. ते एरंडवणे येथील एका गणेश मंडळाचे माजी अध्यक्ष होते. या प्रकरणी त्याचे वडील शिवाजी शिंदे यांनी अलंकार पोलीस ठाण्यात तक्रार दिली आहे. २३ फेब्रुवारी २०१६ रोजी सागर हे दुचाकीवरून करिष्मा चौकाकडे निघाले होते.यावेळी आरोपींनी चारचाकीतून येत त्यांच्या दुचाकीला धडक दिली.रस्त्यावर पडल्यानंतर सागर आरोपींना पाहून त्या ठिकाणाहून पळून जाऊ लागले.

आरोपींनी पाठलाग करत त्यांच्यावर कोयत्याने वार तसेच दगडाने ठेचून गंभीर जखमी केले होते.उपचारादरम्यान त्यांचा मृत्यू झाला. या प्रकरणीअलंकार पोलिसांच्या वतीने न्यायालयात दोषारोपपत्र दाखल करण्यात आले. गुन्हा सिद्ध करण्यासाठी त्यांनी १८ साक्षीदार तपासले. या प्रकरणात दोन प्रत्यक्षदर्शी साक्षीदार आणि दोन डॉक्टरांची साक्ष महत्त्वाची ठरली. दंडाच्या रक्कमेतून सागर यांच्या वडील आणि मुलांना नुकसान भरपाई देण्याचेही आदेशात कोर्टाने नमूद केले आहे.