राज ठाकरे आणि उद्धव ठाकरे हे दोघे एकत्र येण्याबाबत पुन्हा जोरदार चर्चा सुरू झाल्या आहेत. गेल्या काही दिवसांपासून राजकीय वर्तुळात या चर्चा रंगल्या असून आता यावर दोन्ही पक्षांच्या नेत्यांकडून प्रतिक्रिया देखील येत आहेत. अमित ठाकरे यांनी यासंदर्भात प्रतिक्रिया देताना दोन्ही नेत्यांकडे एकमेकांचे नंबर आहेत. युती करण्याची इच्छा असेल तर त्यांनी फोन करून बोलावे. आम्ही यावर बोलून काीच फरक पडणार नाही असे सांगितले होते. त्यानंतर नाशिकमध्ये ठाकरे गट आणि मनसेच्या कार्यकर्त्यांचे मनोमिलन झाले. यानंतर आता ठाकरे गटाचे नेते आणि खासदार संजय राऊत यांनी यासंदर्भात मोठं विधान केले आहे.

संजय राऊत यांनी माध्यमांशी संवाद साधताना राज ठाकरे आणि उद्धव ठाकरे यांच्या एकत्र येण्याबाबत मोठं विधान केले. ते म्हणाले की, 'आम्ही सकारात्मक आहोत म्हणून कार्यकर्त्यांचे मनोमिलन सुरू आहे तुम्ही हे समजून कसं घेत नाही. नेत्यांनी सकारात्मक भूमिका घेतल्यामुळे कार्यकर्त्यांचे मनोबल वाढले आहे. आम्ही सकारात्मक आहोत. राज ठाकरे सकारात्मक आहेत. त्यांचे सहकारी देखील सकारात्मक आहेत. उद्धव ठाकरे सकारात्मक आहेत. अत्यंत सकारात्मक असल्यामुळे जमिनीवरच्या दोन्ही पक्षाच्या कार्यकर्त्यांचा झाला असेल त्याच्यामध्ये चिंतेचा कारण काय?'

मनसे नेते अमित ठाकरे यांच्याबाबत बोलताना संजय राऊत यांनी सांगितले की, 'हे जे मुलं आहेत सगळी त्यांच्या जन्मापासून हे आधी दोन भाऊ आहेत. मी या दोघांनाही पाहिलं आहे. जाहीरपणे मी आता १० मिनिटांनी राज ठाकरे यांना फोन करतोय किंवा दहा मिनिटांनी उद्धव ठाकरे यांना फोन करतो असं सोशल मीडियावर सांगितल्यावर कोणी एकमेकांना फोन करत नाही फोन झाले सुद्धा असतील. मी नेहमी सांगतो की तुम्हाला फळ दिसण्याशी मतलब आहे.

तसंच, 'तुम्हाला लवकर फळ दिसेल. फळ झाडावरती यायला आधी बी लावावे लागते. मग पाणी द्यावे लागते. मग वाढवावे लागते. मग फांद्या येतात अशा अनेक प्रक्रियेतून फळ येतं. त्या प्रक्रियेला सुरुवात झाली आहे. काही दिवसांत तुम्ही असं देखील म्हणा झाडाला खूपच फळ आली आहेत. अमित ठाकरे मी यांना त्यांच्या जन्मापासून पाहिलं. जसा आमचा आदित्य आहे तसा अमित आहे आणि त्यांची विधानही फार गोड आहेत. त्यांच्या मनामध्ये ज्या भावना आहेत त्या भावनेचे काका म्हणून स्वागत करतो त्यांचे विधान चांगले आहे. मी कॅफेमध्ये नाही मी घरी जाईन. आमच्यासाठी ते कॅफे नाही. आमच्यासाठी ते दुसरं घरचं आहे.', असे संजय राऊत यांनी स्पष्टपणे सांगितले.